مەودا میدیا- 

لەگەڵ کۆتاییهاتنی رژێمەکەی بەشار ئەسەد و سەرکەوتنی دەستەی تەحریر شام لە سوریا، سوپای ئیسرائیل لە بەرزاییەکی جۆلان و دەوروبەری دەستی بە جووڵەکرد و چەندین ناوچەی ستراتیژیی دەستبەسەردا گرت، لەنێویاندا "جەبەل شێخ" کە بەپێی شارەزایانی سیاسی و ستراتیژیی بۆ ئیسرائیل گرنگییەکی زۆری هەیە، چاوەڕێی ئەوەش دەکرێت لە داهاتوودا ببێتە خاڵی ناکۆکیی نێوان سوریا، ئوردون، لوبنان و فەلەستین لەلایەک و ئیسرائیلیش لەلایەکی دیکەوە.

"لە جەبەل شێخ دەمێنینەوە"
بنیامین نەتەنیاهۆ، سەرۆک وەزیرانی ئیسرائیل لەگەڵ بەشێکی زۆر لە فەرماندە باڵاکانی سوپای وڵاتەکەی سەردانی جەبەل شێخی کرد و لە بەرزترین شوێنی شاخەکەوە رایگەیاند "هەوڵەکانمان چڕدەکەینەوە بۆ ئامادەیی سەربازیمان لە جەبەل شێخ".

بەدوای ئەو دەستبەسەرداگرتن و لیدوانەی سەرۆک وەزیرانی ئیسرائیلدا، چاوەکان زیاتر کەوتنە سەر جەبەل شێخ و پرسیاری ئەوە خرایەڕوو کە بۆچی ئیسرائیل هێندە بەلایەوە گرنگە بەشێک لە سوپای وڵاتەکەی لە جەبەل شێخ جێگیربکات و تیایدا بمێنێتەوە؟

گرنگییەکانی جەبەل شێخ چین؟
بەپێی تورکی حەسەن، شارەزای سەربازی و ستراتیژیی کە قسەی بۆ کەناڵی ئەلعەرەبییە کردووە، لەم رووانەوە جەبەل شێخ بۆ ئیسرائیل گرنگن:

بەهای ئایینی: جەبەل شێخ ٧٠ جار ناوی لە دەقەکانی جوو دا هاتووە، ئەوەش لای جووە توندڕەوەکان گرنگییەکی تایبەتی هەیە:

گرنگیی سەربازی: جەبەل شێخ 2814 مەتر لە ئاستی دەریاوە بەرزە، ئەوەش دەبێتە خاڵ و پێگەیەکی چاودێریی باشی ئیسرائیل بەسەر هەریەکە لە وڵاتانی "سوریا، ئوردون، فەلەستین و لوبنان".

گرنگیی ئابووری: جەبەل شێخ سەرچاوەیەکی بنەڕەتییە بۆ ئاو، سەرچاوەی هەڵقوڵانی رووبارە سەرەکییەکانی ئەلوەزانی و جەرجەرەیە کە ئەوەش ساڵانە 1.5 ملیار مەتر چوارگۆشە ئاو دابیندەکات.

"ئیسرائیل دەیەوێت دۆخێکی نوێ لەو ناوچانە بسەپێنرێت"
لەگەڵ ئەوەی ئیسرائیل لە ساڵی ١٩٦٧ەوە، ئیسرائیل لەو ناوچەیە ئامادەیی هەیە و بۆ چاودێریکردن بەکاریدەهێنێت، لەگەڵ ئەوەشدا بارودۆخی ئێستای سوریا بەدەرفەت دەزانێت بۆ ئەوەی رووبەری زیاتری خاکی سوریا لەو ناوچەیە دەستبەسەردا بگرێت و بیکاتە گرەنتیی پارێزگاریی ئەمنی زیاتری بۆ خاک و وڵاتەکەی.

"بەهۆی نەبوونی هێزی سەربازیی خاوەن تواناوە، ئیسرائیل بەردەوام بارودۆخێکی وا دەخوڵقێنێت، بەشێوەیەک ناوچەکانی جەبەل شێخ، درعا و وادی یەرموک دەگرێتەوە"، ئەمە بەپێی قسەی تورکی حەسەن، شارەزای سەربازی و ستراتیژی. هەروەها نەبوونی هەڵوێستیی جدی لەسەر ئاستی نێودەوڵەتی هانی زیاتری ئیسرائیل دەدات بۆ دەستگرتن بە ناوچەی دیکە لەناو خاکی سوریا.

خ.غ