مەودا میدیا-

ئەمڕۆ پێنجشەممە 2025/5/15، سەرۆكی شارەوانیی هەڵەبجە سەبارەت بە زۆربوونی دیاردەی ئاژەڵی بەرەڵا ئاشکرایکرد تاوەکو ئێستا 70 مانگایان لەسەر شەقامەكان دەستبەسەرکردووەو، بۆ هەر مانگایەك 150 هەزار دینار لە خاوەنەكانیان وەرگیراوەو بە كۆی گشتیی دەكاتە 10 ملیۆن و 500 هەزار دینار.

سەلام بیلال ئەسکەندەر، سەرۆكی شارەوانیی هەڵەبجە رایگەیاند "ئاژەڵ زیانی زۆر بە ژینگە و ماڵی هاوڵاتییانی شارەکە گەیاندووە، بۆیە بڕیاریانداوە هەر  ئاژەڵێك لەسەر شەقامەکان ببینن، خاوەنەكەی بە 150 هەزار دینار سزا بدەن".

ئاماژەی بۆ ئەوەشکرد " بەشێكی زۆری ئەو هاوڵاتییانەی ئاژەڵدارن، ئاگاداری مانگاكانیان نین، بەرەڵایان دەكەن و دێنە سەر شەقامەكان و شوێنە گشتیی و كشتوكاڵییەكان، زیان بە ماڵی خەڵكی دەگەیەنن".

ئەوەشی خستەڕوو "تاوەکو ئێستا 70 سەر مانگا لەسەر شەقامەكان دەستبەسەرکراون، بۆیە داوا لە هاوڵاتییان دەكەن ئاگاداری ئاژەڵەكانیان بن، چونكە زیان بە ماڵ و ژینگەی پارێزگاكە دەگەیەنن".

ب ح