مەودا میدیا-

فەرماندی گشتیی هێزەکانی سوریای دیموکرات ئاشکرایکرد ماوەی 15 ساڵە لە شۆڕش و شەڕدان و تاوەکو ئەمڕۆش بەردەوامە و مەترسی هەیە  جارێکی تر ناوچەکانیان رووبەڕووی پەلاماری گرووپەکانی سەربە تورکیا ببێتەوە.

مەزڵوم عەبدی، فەرماندی گشتیی هێزەکانی سوریای دیموکرات(هەسەدە) رایگەیاند "بەهەموو شێوەیەک دژی شەڕن بەڵام ئەوەشی لەدەستیان بێت بۆ پاراستنی ئەزموونەکەیان درێغی ناکەن".

ئاماژەی بۆ ئەوەشکرد "لە ئەنجامی 15 ساڵەی شۆڕشی رۆژئاوای کوردستان، روو لە ئازادی چەندین دامەزراوەی نەتەوەیی، مەدەنی و سەربازیی بونیادناوەو تاوەکو ئێستا شەڕیان لەپێناو پاراستنی نەتەوەو ناوچەکانیان کردووە".

ئەوەشی خستەڕوو "لەئێستادا هەولێکی ئاگربەست و ئارامی هەیە بەڵام مەترسی سەرهەڵدانەوەی شەڕ و ئاڵوزییەکان هەیە و دەبێت هەموو کات ئامادەبن بۆ رووبەڕووبوونەوەی مەترسییەکان بەڵام ئەوان دەیانەوێت لە سوریایەکی نوێدا کۆتایی بە شەڕ بهێنن و بە رێگای دیالۆگ و ئاشتی دەستکەوتەکان بپارێزن".

باسی لەوەشکرد "رێککەوتنی 10ی ئازار لەگەڵ ئەحمەد شەرع لە دۆخێکی سەختدا بووەو لەئێستاشدا بەهاوکاری هێزە نێودەوڵەتییەکان کاربۆ جێبەجێکردنی بەندەکانی ئەو رێککەوتنە دەکەن هەرچەند رووبەڕووی ئاستنەگ بووەتەوە بەهۆی دەستوەردانی دەرەکی لە دۆخی ناوخۆی سوریا".

ب ح