مەودا میدیا-

مامۆستایەکی ئایینی لە شاری سنەی رۆژهەڵاتی کوردستان بەتۆمەتی سووکایەتی بە شۆڕشی ئیسلامی ئێران بە زیندانیکردنی زیاتر لە پێنج ساڵ بەشێوەی یەکلایەنە بەسەریدا سەپێندراوە و هیچ ئەگەرێکی یاسایی بە مەبەستی پێداچوونەوە یان ناڕەزایەتیی دادوەریی سەبارەت بەو سزایە بوونی نییە

رێکخراوی هەنگاو بۆ مافی مرۆڤ رایگەیاند " مامۆستا لوقمان ئەمینی، کەسایەتی ئایینی و خەڵکی جوانڕۆ، لەلایەن خانەی دادی تایبەت بە مامۆستایانی تاران بەتۆمەتی سووکایەتی بە شۆڕشی ئیسلامی سزای پێنج ساڵ و یەک مانگ زیندانیکردن و داماڵینی هەتاهەتایی جلوبەرگی ئایینی بەسەردا سەپێندراوە". 

ئاماژەی بۆ ئەوەشکرد "ئەو مامۆستایە پێشتر لەلایەن دادگای تایبەت بە مامۆستایانی هەمەدان بە تۆمەتی راگرتنی چەکی کەمەری سزای پێنج ساڵ زیندانیکردن و بەتۆمەتی پڕوپاگەندەی دژ بە حکومەت لەبەرژەوەندی حزبە کوردستانییەکان سزای یەک ساڵ بەندکردن و بەتۆمەتی هاندانی خەڵک بۆ ئاژاوە و پاڵپشتی لە ناڕازییان سزای پێنج ساڵ زیندانیکردن و دانانی هەمیشەیی جلوبەرگی ئایینی، بێبەشی هەمیشەیی لە وتاردان و دوو ساڵ دوورخستنەوە بۆ ئەردەبیلی بەسەردا سەپێندرابوو".

ئەوەشی خستەڕوو "مامۆستا لوقمان ئەمینی لە 2025/4/21، پاش بانگکردن و سەردانی دادگای تایبەت بە مامۆستایانی هەمەدان دەستبەسەرکراوە و بۆ بەندیخانە گواسترابووە و رۆژی 2025/6/12 پاش 43 رۆژ لە بەندکردن بەدانانی بارمتە و بەشێوەی کاتی لە بەندیخانەی هەمەدان ئازادکرابوو".

ب ح