مەودا میدیا-
هەفتەی رابردوو جارێكیتر نرخی زێڕ رووی لە هەڵكشان كردەوە و شەوی رابردووش پێش داخستنی بازاڕە داراییەكان نرخی هەر ئۆنسەیەك گەیشتە 4,226 دۆلار. 

پێشڕەو محەمەد، شارەزای بازاڕە داراییەكان بە مەودا میدیای راگەیاند"ئێستا هاوڵاتییان و بازرگانان بە تایبەت لە چاوەڕوانی كەمكردنەوەی سوودی بانكین لەلایەن بانكی ناوەندی ئەمەریكاوە، ئەوەش بووەتەهۆی ئەوەی كە نرخی زێڕ تا دێت زیاتر بەرزتر دەبێتەوە". 

وتیشی"ئەگەر دۆخەكە بەپێی پێشبینییەكان بڕوات و سوودی بانكی كەم بكرێتەوە، ئەوا نرخی زێڕ لەو ئاستەی ئێستای زۆر زیاتر بەرزدەبێتەوە و لە ساڵی داهاتووشدا ئاستێكی نوێی پێوانەیی تۆمار دەكات كە تا ئێستا پێی نەگەیشتووە". 

ئاماژەی بۆ ئەوەش كرد"رێكەوتنەكانی نێوان ئەمەریكا و چین لەلایەك و راگرتنی جەنگی نێوان روسیا و ئۆكرانیاش لەلایەكی دیكەوە هەریەكە و كاریگەری جیاوازیان لەسەر نرخی زێڕ هەیە و ئەگەر دوو وڵاتی یەكەم بگەنە رێكەوتن و دوو وڵاتی دووەمیش كۆتایی بە جەنگ بهێنن، ئەوا نرخی زێڕ دابەزینێكی گەورە دەكات و پێشبینی دەكەن نرخەكەی بگەڕێتەوە بۆ نزیكەی 3,750 دۆلار بۆ هەر ئۆنسەیەك". 
ئ پ