مەودا میدیا-

سبەینێ پێنجشەممە، دوانزەهەمین دادگایی كەیسی سێوان قادر و سێ منداڵەكەی لە دادگای سلێمانی بەڕێوەدەچێت.

بنار عادل نادر، پارێزەری سێوان قادر و منداڵەكانی بە مەودا میدیای راگەیاند "رۆژی پێنجشەممە، دوانزەهەمین دادگایی بەڕێوەدەچێت و بڕیارە وتەی چەند كەسێك لەسەر كەیس و رووداوەكە وەربگیرێت".

ئاماژەی بەوەشكرد "كەیسەكە زۆری نەماوە و پێشبینی دەكەین دوای چەند دانیشتنێكی كەم و لە رۆژانی داهاتوو یەكلابكرێتەوە".

وتیشی" ئێمە چاوەڕێی بڕیاری دادوەر و دادگا دەكەین بۆ ئەو كەیسەو  سەپاندنی سزا بەسەر تاوانبار كە هاوسەری سێوان قادرە".

لە ناوەڕاستی مانگی تشرینی دووەمی ساڵیی 2018 لە رووداوێكی گوماناویدا لە قەزای چەمچەماڵ، سێوان قادر و سێ منداڵەكەی لە ناو ماڵی خۆیان سوتان، دوای ئەوەی دەستبەجێ سێ منداڵەكەی گیانیان لە دەستدا، دوای هەفتەیەك مانەوە لە نەخۆشخانە خۆشی گیانی لە دەستدا.