مەودا میدیا-

تا دێت ژمارەی تووشبوون بە ڤایرۆسی كۆرۆنا لە هەولێر لە بەرزبوونەوەدایە و لە ماوەی چەند رۆژی رابردووش چەند حاڵەتێكی مردن بە كۆرۆنا لە شارەكە تۆماركراوە و بەڵام لە پێناو دامركاندنەوەی توڕەیی هاوڵاتیان لە خراپی دۆخ و گوزەرانی ژیانییان، بەپەلە بڕیارەكان و رێنماییەكانی خۆپارێزی هەڵوەشێنرانەوە.

بۆ ئەوەی هاوڵاتیان هیچ ناڕەزایەتی و خۆپیشاندانێك نەكەن، رۆژی رابردوو بەپەلە هەر یەكە لە فرسەت سۆفی، پارێزگاری هەولێر و رێبەر ئەحمەد، وەزیری ناوخۆی حكومەتی هەرێمی كوردستان بەپەلە كۆنگرەیەكی رۆژنامەنوسیان ئەنجامداو بەناچاری قەدەغەی هاتووچۆو رێنماییەكانیان هەڵوەشاندە و رێگەیان بە هاوڵاتیاندا دوكان و شوێنەكان بكەنەوە.

بەپێی ئامارەكانی وەزارەتی تەندروستی حكومەتی هەرێمی كوردستان كە رۆژانە بڵاوی دەكاتەوە، رێژەی تووشبوون بە ڤایرۆسی كۆرۆنا لە شارەكە لە زیادبووندایە.

بە ئاشكرا هاوڵاتیانی هەولێر لە تۆڕە كۆمەڵایەتییەكانەوە باس لەوە دەكەن كە ئەوان ناڕەزایەتی زۆریان لەو دۆخەی ئێستا هەیە بەڵام لە ترسی هێزەكان و گرتن ناتوانن ئەوە ئەنجام بدەن و داوای مافی خۆیان بكەن.

هەولێر یەكێكە لەو شارانەی كە زۆرترین ناڕەزایەتی هاوڵاتیانی تێدایە، بەڵام بەردەوام هێزە ئەمنییەكان و حزبی باڵادەست رێگە بە خۆپیشاندان نادات و سەركوتیان دەكات و دەیانگرێت و ئەشكەنجەیان دەدات.