مەودا میدیا-

ئه‌حمه‌د سافی، به‌ نوێنه‌رایه‌تی عەلی سیستانی، مه‌رجه‌عی باڵای شیعه‌ له‌ عیراق وتاری ئه‌مڕۆ هه‌ینی له‌ كه‌ربه‌لا خوێنده‌وه‌ لە وتارەکەدا کە ئەحمەد سافی خوێندیەوە سیستانی داوای لە ئەنجومەنی نوێنەرانی عیراق کرد په‌له‌ بكات بۆ په‌سندكردنی چاكسازییه‌ سیاسییه‌كان و زه‌مینه‌ سازی بۆ هه‌ڵبژاردنی داهاتوو.

ئه‌حمه‌د سافی لە وتارەکەدا ئاماژەی بەوەکرد "مه‌رجه‌عیه‌ت به‌ وردی چاودێری ره‌وشه‌كه‌ ده‌كات و نیگه‌ران و خه‌مباره‌ له‌ باره‌ی هه‌واڵی پێكدادانی نێوان هێزه‌ ئه‌منییه‌كان و خۆپیشانده‌ران له‌ ناسریه‌ و نه‌جه‌ف، كه‌ بووه‌ هۆی رژانی خوێنی هاوواتیان و سوتانی ژماره‌یه‌ك دامه‌زراوه"‌.

سیستانی له‌ په‌یامه‌كه‌یدا داواشی له‌ خۆپیشانده‌ران كردووه‌ "ریزه‌كانیان له‌ كه‌سانی خراپه‌كار پاكبكه‌نه‌وه‌ و رێگه‌ نه‌ده‌ن ئه‌و جۆره‌ كه‌سانه‌ خۆپیشاندانی ئاشتیخوازانه‌یان بگۆڕن بۆ زیانگه‌یاندن به‌ دامه‌زراوه‌كانی وڵات و هاوڵاتیان". 

لە وتارەکەشدا ئەحمەد سافی وتی "مه‌رجه‌عیه‌ت هیوای چاكبوونه‌وه‌ بۆ برینداره‌كان ده‌خوازێت و داواش ده‌كات هاوڵاتیان ئارام بگرن له‌سه‌ر له‌ده‌ستدانی كه‌سوكاریان".