مەودا میدیا - کاروان نوری

بڕیاردەری لیژنەی دارایی لە پەرلەمانی عیراق رایگەیاندووە، بەغدا ئامادەیە بودجە و مووچەی فەرمانبەرانی هەرێمی کوردستان بدات، لە بەرانبەردا دەبێت هەرێم (50%)ی نەوتەکەی رادەستی کۆمپانیای سۆمۆ بکات.
 
ئەحمەد سەفار، بڕیاردەری لیژنەی دارایی پەرلەمانی عیراق بە میدیاکانی عیراقی راگەیاندووە "بەپێی ئەو مەرجانەی حکومەتی عیراقی دایناوە، دەبێت هەرێم (50%)ی نەوتەکەی رادەستی کۆمپانیای سۆمۆ بکات ‌و نیوەی داهاتی فڕۆکەخانە و دەروازە سنوورییەکان بۆ حکومەتی به‌غدا بگەڕێنێتەوە".

ئەوەشی خستووەتەڕوو "لە بەرانبەردا بەغدا بەڵێن دەدات بە ناردنی بودجە و مووچەی فەرمانبەرانی هەرێمی کوردستان و شایستە داراییەکانی ئەو کۆمپانیا بیانییانە دەدات کە لە کەرتی نەوتیی هەرێمی کوردستاندا کاردەکەن".

ئەمە لە کاتێکدایە بڕیارە جارێکی دیکە شاندێک رەوانەی بەغدا بکرێت، چاوەڕوان دەکرێت شاندەکە لەبارەی بودجەی (2021) و ناردنی 320 ملیارەکەی هەرێمی کوردستان بۆ سێ مانگی کۆتایی ئەمساڵ، گفتوگۆ لەگەڵ حکومەتی فیدراڵی بکات.