مەودا میدیا - کاروان نوری

بۆ یەکەمجار لە هەرێمی کوردستان نەشتەرگەرى دڵ بۆ منداڵان ئەنجامدرا و یاریدەدەرى بەڕێوەبەرى نەخۆشخانەى سەنتەرى دڵیش دەڵێت، مەبەستیانە ئەو تێچووە زۆرەی کە پێویستە بۆ بردنە دەرەوەی نەخۆشەکان نەمێنێت و لە ناو هەرێم هەمان نەشتەرگەری ئەنجام بدرێت.

ئەمڕۆ پێنجشەممە، د. باوەڕ حوسێن، یاریدەدەرى بەڕێوەبەرى نەخۆشخانەى سەنتەرى دڵ لە کۆنفرانسێکدا رۆژنامەوانیدا رایگەیاند "بۆ یەکەمجارە لە هەرێمی کوردستان نەشتەرگەرى دڵ بۆ منداڵان کراوە، کە پێشتر ئەو جۆرە نەشتەرگەریانە لە دەرەوەی وڵات بە بڕە پارەیەکی زۆر ئەنجام دەدران، تا ئێستاش 15 نەشتەرگەری بەبێ بەرانبەر ئەنجامدراوە".

ناوبراو ئەوەشی خستەڕوو "نەخۆشیی دڵى منداڵان زۆر زۆرە، بەتایبەتى ئەو نەخۆشییانەی کە زگماکیى منداڵانەیە  و لەمەودوا ئەو نەشتەرگەرییە بە خۆڕایی ئەنجام دەدرێت، نەشتەرگەرییەکەش لەلایەن کۆمەڵە دکتۆرێکی پسپۆڕ و شارەزای وڵاتی هیندستانەوە ئەنجام دەدرێت".