مەودا میدیا-رەنگین عارف

دەستلەکارکێشانەوەی عادل عەبدولمەهدی کێشەی گەورەی بۆ رێککەوتنی نێوان هەرێم و بەغدا درووستکردووە و ئەگەرچی باس لەوە دەکرێت مووچەی فەرمانبەران مەترسیی لەسەر نییە، بەڵام رێککەوتنەکە جارێکی تر بە قورس دەزاندرێت و هەرێم و بەرپرسەکانیشێ تۆمەتبار دەکرێن بەوەی نەیانتوانیوە نەری و دۆستایەتیی عەبدولمەهدی لەگەڵ کورد بۆ رێککەوتنێکی درێژخایەن بقۆزنەوە.

هەرێم و بەغدا گەیشتبوونە دوایین قۆناغی رێککەوتنەکەیان و بڕیار بوو لە چەند رۆژی داهاتوودا واژۆ بکرێت، بەڵام فشاری خۆپیشاندەرانی عیراق و بەردەوامیی ئاڵۆزییەکان نامەی دەستلەکارکێشانەوەی بە عەبدولمەهدی نووسی، ئەوەش ئەو رێککەوتنەی بە واژۆنەکراوی لەسەر کاغەز هێشتەوە و وەک پەرلەمانتاران دەڵێن تازە ئەو کارە قورس بووە و ئەنجامدانی رێككەوتن و تێگەیشتنێکی تر لەگەڵ سەرۆک وەزیرانێکی نوێ کە تائێستا نازاندرێت کێیە و چۆنە کاتێکی درێژتری دەوێت.

هەرێمی كوردستان لەسەر رادەستکردنی 250 هەزار بەرمیل نەوتی رۆژانە بە بەغدا رەزامەند ببوو و بەغدا بڕە بودجەی هەرێمی مانگانە دەنارد و لەو 200 هەزار بەرمیل نەوتەی تری هەرێمیش بەغدا سەرپشکی کردبوو قەرزەکانی خۆی پێ بداتەوە، بەڵام داهاتی گومرگی هەرێم لەنێوانیاندا بەش دەکرا.

دکتۆر میران محەمەد، ئەندامی ئەنجومەنی نوێنەرانی عیراق لە فراكسیۆنی یەكێتی بە مەودا میدیای راگەیاند "شاندەکانی هەرێم و بەغدا گەیشتبوونە داڕشتنەوەی ئەو پرسانەی لەسەری رێککەوتبوون بۆ واژۆکردنی، بەڵام دەستلەکارکێشانەوەی عادل عەبدولمەهدی ئەو پڕۆسەیەی راگرت و جارێکی تر و بەو شێوەیە رێككەوتنی هەرێم و بەغدا قورسە".

وتیشی "بەداخەوە هەرێم زۆر کەمتەرخەم بوو لە رێككەوتن، عەبدولمەهدی پیاوێکی باش و دۆستی کورد بوو، ساڵێکە سەرۆکوەزیرانە دەبوو کورد ئەوی بقۆستایەتەوە و رێككەوتنێکی نەک بۆ ساڵێک، بەڵکو بۆ دە ساڵ لەگەڵ بکردایە، بەڵام ئەوەتا دەستلەکاردەکێشێتەوە و هەرێمیش بە خاویی خۆی نەیتوانی سوودی لێ وەربگرێت".

بە بڕوای ئەو پەرلەمانتارە، هەتا کەسێکی تر دەبێتە سەرۆک وەزیرانی عیراق و کابینەی نوێ درووستدەکات لانیکەم سێ مانگی تری پێ دەچێت، ئەوکاتەش نازاندرێت ئەو کەسەی دەبێتە سەرۆک وەزیران چۆن دەبێت و کێ دەبێت و بیرکردنەوەی چۆن دەبێت و رێككەوتنی لەگەڵ هەرێم چۆن دەبێت و ئەو کاتەش چەندی تری پێ دەچێت.

 بەپێی زانیارییە هەواڵییەکان، بڕیار بوو سبەی یەکشەممە شاندی هەرێم بۆ داڕشتەی کۆتایی و واژکردنی رێككەوتنەکەی نێوان هەرێم و بەغدا بچنەوە بەغدا، بەڵام رۆیشتنی ئەو شاندە بۆ بەغدا بۆ کاتێکی نادیار هەڵوەشاوەتەوە.

فارس عیسا، نوێنەری حکومەتی هەرێم لە بەغدا بە مەودا میدیای وت "دەستلەکارکێشانەوەی عەبدولمەهدی کاریگەریی لەسەر رێككەوتنەکەی هەرێم و بەغدا درووستدەکات، بەڵام ئەو کاریگەرییە نابێت کە تەواوی رێككەوتن و تێگەیشتنەکان هەڵبووەشێنەوە، بەڵکو لەسەر هەندێ پرسی تەکنیکی و هەندێ رەقەم لە ناردنی نەوت و بودجە گفتوگۆی زیاتر پێویست بێت لەگەڵ سەرۆکوەزیرانی تازە".

وتیشی "هەرێم لە دەستووردا دانی پێدا نراوە و هەر کەسێکیش ببێتە سەرۆک وەزیرانی عیراق دەبێت لەگەڵ هەرێمی کوردستاندا رێکبکەوێت، ئەو کێشەیەی نێوان هەرێم و بەغدش تازە نییە و هی عەبدولمەهدیش نییە، بەڵکو کێشەی نێوان دوو حکومەتە و دەبێت هەرچۆنێک بێت و هەرکەسێک بێت رێككەوتن بکرێت".