کوردستانی
لێکۆڵینەوە لە مەلەفی چوار هەزار شەهید و ئەنفالکراو دەکرێت
مەودا میدیا - سلێمانی |

مەودا میدیا-
بەھۆی جێبەجێکردنی یاسای چاکسازی بڕیارە پێداچوونەوە بە مەلەفی شەھیداندا بکرێت و بەرپرسێکی وەزارەتی کاروباری شەھیدانیش دەڵێت، تەنیا لە ھەولێر خەریکی پاککردنەوەی چوار ھەزار مەلەفین و ئەوانەی ناشایستەن ناویان لە لیستی شەھیدان لادەبرێت.
داماو محەمەد، بەڕێوەبەری گشتیی شەھیدان و ئەنفالکراوانی ھەولێر، دەڵێت "پڕۆسەی چاکسازی لە سنووری بەڕێوەبەرایەتیی گشتیی شەھیدانی ھەولێر دەستیپێکردووە و هەفتانە دوو رۆژ ژمارەیەک فەرمانبەر لە بەیانییەوە تا درەنگی ئێواران خەریکی ھەڵدانەوەی مەلەفی شەھید و ئەنفالکراوانن، حکوومەتی ھەرێمی کوردستان زۆر جددیە لەوەی یاسای چاکسازی وەک خۆی جێبەجێ بکرێت، لەبەر ئەوەش، ئێمە لای خۆمانەوە دەستمان بە پێداچوونەوەی مەلەفی شەھیدان کردووە".
بەڕێوەبەری گشتیی شەھیدانی ھەولێر دەشڵێت "پێداچوونەوەی ورد دەستیپێکردووە و سەردانی مەیدانی بۆ ھەر مەلەفێک پێویست بێت ئەنجامی دەدەین، چونکە تا دڵنیا نەبین کەسێک ناچێتەوە ناو لیستی شەھیدان، بۆ نموونە خەڵک ھەیە خۆم دەیناسم لە کاتی ئەرکی پێشمەرگایەتی گیانی لەدەستداوە، یان بەھۆی رووداوێک لە چوارچێوەی دەوامی فەرمیدا گیانیان لەدەستداوە ئێستا دەبێت ناوەکەی بگەڕێتەوە خانەنشینی نەک شەھیدان".
داماو محەمەد، ئاشکراشیکرد "ئەمجارە لێکۆڵینەوەی تەواو و مەیدانی بۆ ھەموو شەھیدێک دەکرێت ئەگەر لە پێداچوونەوەی مەلەفەکەی پێویستی بە بەڵگە ھەبوو تا ئێستا پێداچوونەوەمان بە مەلەفی نزیکەی چوار ھەزار شەھید و ئەنفالکراودا کردووە و پڕۆسەکە بەردەوامە و تا یەک ناو مابێت پێداچوونەوەی بۆ دەکرێت".
ه.ع
بیروڕا



