مەودا میدیا-

چەند رۆژێکە دەنگۆی ئەوە بڵاوبووەتەوە کە عەبدوڵڵای کوێخا موبارەک و چەند هەڵسوڕاوێکی پێشووی گۆڕان پەیوەندییان بە پارتی دیموکراتی کوردستانەوە کردبێت.

ئەمڕۆش ماڵپەڕی درەو میدیای نزیک لە هەڵسوڕاوە نارازییەکانی بزووتنەوەی گۆڕان هەواڵەکەی پشتڕاست کردەوە و زانیاری زیاتری خستووەتەڕوو.

ماڵپەڕەکە لە زاری مەلا سەربەست، ئەندامی جڤاتی گشتیی بزووتنەوەی گۆڕانەوە بڵاویکردووەتەوە "هەتا خۆمان راینەگەیەنین ئەو هەواڵانەی بڵاودەكرێنەوە، پشتڕاستی ناكەینەوە"، ئەمەش وا لێکدەدرێتەوە کە هەواڵەکە راست بێت و هێشتا نەیانەوێت رایبگەیەنن.

هەر ئەمڕۆ، عەلی حەمەساڵح، ئەندامی پەرلەمانی کوردستان لە فراکسیۆنی گۆڕان لە لاپەڕەی تایبەتی خۆی لە تۆڕی کۆمەڵایەتی فەیسبووک رایگەیاند "پارتی بە پارەی میللەت‌ و پلەی سەربازیی، ھەڵسوڕاوی گۆڕان دەکڕێت، ئه‌مه‌  نە بەشداریە و نە شەراکەت".

عەبدوڵڵا کوێخا موبارەک پێشتر ئەندامی جڤاتی نیشتمانیی بزووتنەوەی گۆران بوو، یەکێک بوو لە هەڵسوڕاوە توندەکانی بزووتنەوەکە و هەڵوێستی توندی دژی پارتی و یەکێتی هەبوو.

ب.م