مەودا میدیا-

لیژنەی هاوبەشەکانی قائیمقامیەت بە هاوکاری ئاسایشی گەڕەکی چوارچرای شاری سلێمانی لە کۆگایەکی فرۆشیاری پەیجەکانی ئۆنلاین دەست بەسەر بڕێکی زۆر دەرمانی نایاساییدا دەگرێت و لیژنەکەش داوا لە هاوڵاتیان دەکات لەڕێی ئۆنلاینەوە دەرمان نەکڕن. 

ئەمڕۆ پێنج شەممە 30ی کانونی دووەمی 2020  لیژنەی باڵا و لیژنەی هاوبەشەیی تەندروستی سەربە لیژنە هاوبەشەکانی قائیمقامیەتی سلێمانی بەهاوکاری ئاسایشی گەڕەکی چوارچرا، لە کۆگایەکی فرۆشیاری پەیجەکانی ئۆنلاینی تۆڕی کۆمەڵایەتی فەیس بوک، دەستیان بەسەر بڕێکی زۆر دەرمانی قەڵەویی و لاواز کردنی کێشدا گرتووە.

بڕی ئەو دەرمانانە جۆراوجۆرانەی لیژنەی هاوبەشەی تەندروستی دەستی بەسەردا گرتووە زیاترە لە (517) پارچە قتو، کە بەشێوەی نایاسایی هاوردەی شاری سلێمانی کراوە و فرۆشیاران بە دەرمانی دابەزاندن و زیادکردنی کێش بەهاوڵاتیانی دەفرۆشن.

لیژنە هاوبەشەکانی قائیمقامیەتی سلێمانی داوا لە هاوڵاتان دەکات، لەڕێی پەیجی تۆڕە کۆمەڵایەتیەکان دەرمان نەکڕن لەبەر ئەوەی سەرچاوەی هاوردەکردن و شوێنی فرۆشتنیان دیارنیە.

لیژنەی تەندروستی، یەکێکە لە لیژنەهاوبەشەکانی قائیمقامیەتی سلێمانی، رۆژانە سەردانی دەرمانخانە و نەخۆشخانە و ئەو شوێنانە دەکات هاوڵاتیان بۆ وەرگرتنی چارەسەر روی تێدەکەن، لەکاتی هەبونی سەرپێچی و پابەند نەبون بە مەرجەکانی کارکردن شوێنەکە دادەخات و خاوەنەکەشی روبەروی رێکاری یاسایی دەکاتەوە.