مەودا میدیا-

چەند رۆژێکە شاندێکی حکومەتی هەرێمی کوردستان بە سەرۆکایەتیی جێگری سەرۆکی حکومەت سەبارەت بە کێشە هەڵپەسێردراوەکانی نێوان هەرێمی کوردستان و عیراق و پرسی بودجە و پشکی هەرێم لەلایەن بەغداوە، سەردانی بەغدایان کردووە و ئەمڕۆ لەگەڵ سەرۆک کۆماری عیراق کۆبوونەوە و چەند پرسێکیان تاوتوێکرد.

د. بەرهەم ساڵح، سەرۆک کۆماری عیراق ئەمڕۆ سێشەممە 1ی حوزەیرانی 2021 لە کۆشکی سەلام لە بەغدا پێشوازیکرد لە شاندی باڵای حکومەتی هەرێمی کوردستان بە سەرۆکایەتی قوباد تاڵەبانی، جێگری سەرۆکی حکومەتی هەرێم، لە دیدارەکەدا بەگرنگییەوە باس لە بەھێزکردنی ھەماھەنگی و هاریکاری بونیادنەر لە نێوان حکومەتی فیدرال و حکومەتی هەرێمی کوردستان لە سەرجەم بوارەکان کرا، لە پێناو چەسپاندنی ئاسایش و ئارامی وڵات و یەکلایکردنەوەی کێشە هەڵپەسێردراوە داراییەکان و جێبەجێکردنی پابەندییەکان لە یاسای بودجەی گشتی و زامنکردنی مافی هاوڵاتییان و مووچەخۆران و باشکردن و ھێنانەدی داواکارییە رەواکانی خەڵک بەگوێرەی دەستوور.

لە بەشێکی دیکەی دیدارەکەدا سەرۆک کۆمار ئاماژەی بەوەکرد، چارەسەرکردنی کێشەکان لە رێگەی لێکتێگەشتن و دیالۆگ و خواستی هاوبەش دێتەدی بە ئاراستەی ھێنانەدی بەرژەوەندی هاوڵاتییان و یەکلایکردنەوەی دۆسییە هەڵپەسێردراوەکان، بەتایبەتی بابەتی بودجەی گشتی بە گوێرەی دەستوور و یاسا و پاراستنی مافی ھاووڵاتیانی عیراق و ھەرێمی کوردستان و مووچەخۆران و خانەنشینانی هەرێمی کوردستان بەبێ جیاوازی.

هاوکات گفتوگۆکرا دەربارەی پێشهاتەکانی دۆخی سیاسی و ئابووری و یەکخستنی هەوڵەکان بۆ ریشەکێشکردنی پاشماوەکانی داعش کە مەرامیانە ئارامی ھەندێک ناوچە تێکبدەن.

پ.ح