مەودا میدیا-

چاودێرێکی سیاسیی ئاشکرایکرد "گرووپە چەکدارییە شیعییەکان بوونەتە هۆکاری سەرەکی ناسەقامگیربوونی عیراق بە تایبەتی و سوریا و ناوچەکە بە گشتی، ویلایەتە یەکگرتووەکانی ئەمەریکا پێی وایە گروپە میلیشیاکانی وەک حەشدی شەعبی و هاوشێوەکانی دەبنە بەربەست بۆ کارەکانی لە عیراق و سوریا و ناوچەکە، بەهۆی ئەوەی بەوە تۆمەتباریان دەکات کۆماری ئیسلامیی ئێران پاڵپشتییان دەکات".

سەبارەت بە هێرشەکانی درەنگانی شەوی رابردووی ئەمەریکا و ئیسرائیل بۆ سەر بنکە و بارەگاکانی حەشدی شەعبی لە سنووری عیراق و خاکی سوریا هیوا عوسمان، چاودێری سیاسیی بە مەودا میدیای راگەیاند "گرووپە چەکداراییە شیعییەکان هۆکارێکی سەرەکین بۆ تێکدانی ئاسایش و سەقامگیری عیراق، دەبێت حکومەتی عیراق سنوورێکی یاسایی بۆ ئەو گروپانە دابنێت و ئاسایش و ئەمنییەت بۆ عیراق بگەڕێنێتەوە".

سەبارەت بەوەی هێرشەکان کاریگەری لەسەر هەرێمی کوردستان دەبێت روونیکردەوە "لە رووی ئاسایش و ئەمنییەوە نەخێر هیچ کاریگەری بۆ سەر هەرێمی کوردستان نابێت، بەڵام تێكچوونی ئاسایش و سەقامگیری عیراق، کاریگەری لەسەر کایەی سیاسیی هەرێمی کوردستان دەبێت، بەهۆی ئەوەی هەرێمی کوردستان بەشێکە لە دەستووری عیراق".

ئاماژەی بەوەشکرد "ویلایەتە یەکگرتووەکانی ئەمەریکا پێی وایە حەشدی شەعبی و گرووپە هاوشێوەکانی دەبنە بەربەست بۆ فراوانبوونی کارەکانی لە عیراق و سوریا، بەتایبەت کە ئەمەریکا دەیەوێت دەوڵەتێکی عیراقی بەهێز لەژیر هەژموونی خۆیدا دروستبکات لە ناوچەکەدا، بێگومان ئێران ئەمە قبوڵ ناکات، هەر بۆیە ئەمەریکا گرووپە چەکدارییەکان بەوە تۆمەتبار دەکات کە کۆماری ئێسلامیی ئێران پاڵپشتییان بکات و سەر بە ئێرانن".

ئەمەش دوای ئەوەدێت، درەنگانی شەوی رابردوو فڕۆکە جەنگییەکانی ئەمەریکا لە سنووری عیراق و سوریا بنکە و پێگە سەربازییەکانی حەشدی شەعبییان بۆردومان کرد، هاوکات فڕۆکەکانی ئیسرائیل لە خاکی سوریا پێگەکانی حەشدی بۆردومان کرد، حەشدی شەعبیش لە راگەیەندراوێکدا ئاماژەی بەوەکرد لە ئەنجامی هێرشەکاندا پێنج چەکدارییان کوژراوە.

پ.ح