مەودا میدیا-

كۆمپانیای دیلۆیتی جیهانی لە چوارچێوەی پرۆسەی وردبینی سەربەخۆیی كەرتی نەوت و گاز راپۆرتی چارەكی چوارەمی ساڵی 2020ی تایبەت بە داتا و زانیاری نوێ لەبارەی هەناردەكردن، بەكاربردن، خەرجی و داهاتەكانی نەوت لە 1ی تشرینی یەكەمی 2020 تا 31ی كانوونی یەكەمی 2020 بڵاوكردەوە.

كۆمپانیای (دیلۆیت) ی جیهانی سەبارەت بەوردبینی كەرتی نەوت و گاز لە هەرێمی كوردستان – عیراق راپۆرتێکی نوێی بڵاوکردەوە و رایگەیاند "هەرێم بەردەوام دەبێت لەسەر كاركردن بۆ برەودان و دەوڵەمەندكردنی راپۆرتەكانی وردبینی و پێداچوونەوە بە پشتبەستن بە سەرنج و پێشنیازی لایەنە پەیوەندیدارەكان و لەناویشیاندا كۆمەڵگەی نێودەوڵەتی".

ئاماژە بەوەشکردووە "لە چوارچێوەی پڕۆژەی وردبینی سەربەخۆی كەرتی نەوت و گاز لە هەرێمی كوردستان و وەك بەشێك لە دەستپێشخەری تایبەت بە شەفافییەت لە بەرنامەی كاری ئەنجومەنی وەزیران، حكومەتی هەرێمی كوردستان بە بەردەوامی هەڵسەنگاندن بۆ ئاشكراكردنی زانیاری سەربار دەكات بۆ پەرەپێدانی شەفافییەت لە بواری كەرتی نەوت و گاز, بەمجۆرە، حكومەتی هەرێمی كوردستان لە ساڵی 2017ەوە بە بەردەوامی راپۆرتەكانی وردبینیكردنی كەرتی نەوت و گاز لە هەرێمی كوردستان پشتڕاستكراوە لەلایەن كۆمپانیای (دیلۆیت)ەوە بۆ رای گشتی بڵاو دەكاتەوە. وە لە ساڵی (2019)ەشەوە داتا و زانیاری پێشكەش كردووە دەربارەی ڕەسیدی پێشەكیدراو بە هەرێمی كوردستان كە قەرزاری كڕیارەكانی نەوتە. لە ساڵی 2020دا ئاشكراكردنی زانیارییەكان فراوان كران و هاوتاكردنی داتاكانی نێوان بەرهەمهێنان و هەناردەكان و بەكاربردنی ناوخۆشی گرتەوە".

ئەوەشی خستووەتەڕوو "حكومەتی هەرێمی كوردستان بەردەوام دەبێت لەسەر كاركردن بۆ برەودان و دەوڵەمەندكردنی ڕاپۆرتەكانی وردبینی و پێداچوونەوە بە پشتبەستن بە سەرنج و پێشنیازی لایەنە پەیوەندیدارەكان، لەناویشیاندا كۆمەڵگەی نێودەوڵەتی، سەرەڕای كاركردن بە هاوبەشی لەگەڵ دامەزراوەكانی چاودێری و وردبینی هەرێمی كوردستان بۆ پەرەپێدانی توانا مرۆییە ناوخۆییەكانی بواری وردبینیی كەرتی نەوت و گاز و حكومەتی هەرێمی كوردستان دووپاتی پابەندبوونی خۆی دەكاتەوە لە بەرامبەر هاووڵاتییانی هەرێمی كوردستان كە بەردەوام دەبێت لەسەر وردبینی و پێداچوونەوەی سەربەخۆ بۆ سێكتەری نەوت و گاز بە هەموو پرۆسە و بەشەكانییەوە".

لەم لینکەوە دەتوانن خوێنەری دەقی راپۆرتی دیلۆیت بن