مەودا میدیا-

عیراق و هەرێمی کوردستان ماوەی 30 ساڵە بەدەست نەبوونی کارەبای 24 کاتژمێری دەناڵێنن و تائێستا نەتواندراوە بڕی کارەبای پێویست دابینبکرێت، هەفتەی رابردوو کارەبای عیراق بە تەواوەتی هەرەسی هێنا و سەرجەم شارەکانی عیراق بۆ ماوەی چەند کاتژمێرێک بێ کارەبا بوون.

چەند سەرچاوەیەکی عیراقی بڵاویانکردەوە حکومەتی عیراق لەماوەی 18 ساڵی رابردوودا بڕی 80 ملیار دۆلاری بۆ پرۆژەکانی بەرهەمهێنانی کارەبا خەرجکردووە، بەڵام تائێستا نەتواندراوە کارەبای 24 کاتژمێری دابینبکرێت، عیراق پێویستی بە 28 هەزار مێگاوات کارەبایە، بەڵام لەئیستادا 20 هەزار مێگاوات کارەبا بەرهەمدەهێنێت.

هەفتەی رابردوو بۆ ماوەی چەند کاتژمێرێک کارەبای سەرجەم پارێزگاکانی عیراق بڕا، ئەمەش بووە هۆی دروستبوونی ناڕەزایی هاوڵاتییان، بۆ ئەم مەبەستەش مستەفا کازمی، سەرۆک وەزیرانی عیراق ژمارەیەکی بەرپرسی کارەبای لە پۆستەکانیان دوورخستەوە و سزای یاسایی دان.

هەرێمی کوردستانیش بێبەش نییە لە بوونی گرفتی کارەبای نیشتمانی و لەئێستادا بڕی سێ هەزار و 400 مێگاوات کارەبا بەرهەمدەهێندرێت و رۆژانە 14 بۆ 15 کاتژمێر کارەبا دەدەرێتە هاوڵاتییان.

پ.ح