مەودا میدیا-

تای خوێنبەربوون یەکێکە لە نەخۆشییە ڤایرۆسییەکان و لە ئاژەڵەوە بۆ مرۆڤ دەگوازرێتەوە، پزیشکێکی ڤێترێنەریش دەڵێت "تا ئێستا هیچ چارەسەرێکی دیاریکراوی نییە".

 زانا حەمید، پزیشکی ڤێتەرنەری لەبارەی هۆکای تووشبوون بە تای خوێنبەربوون و شێوازی گوازستنەوەی بە مەودا میدیای راگەیاند "تای خوێنبەربوون ڤایرۆسی RNA سەرچاوەکەیەتی و ئەو ڤایرۆسە لە ئاژەڵاندا سەر هەڵدەدات و لە رێگای لیک و خوێن و گۆشەتەوە بۆ مرۆڤ دەگوازرێتەوە، و زۆر جار دەبێتە هۆی گیانلەدەستدانی ئەو کەسەی تووشی دەبێت".

 روونیشیکردەوە "یەکێک لە هۆکارە سەرەکییەکانی گواستنەوەی ڤایرۆسەکە مێرووەکانە، بەتایبەت مێروی (گەنە) و هەروەها لە رێگای لیکی ئاژەڵ و خوێنیشەوە دەگوازرێتەوە".

 ئاماژەی بۆ ئەوەشکرد، پێویستە هاوڵاتییان خۆیان بپارێزن لە بەرکەوتنیان بە ئاژەڵان و بەتایبەت لە ئێستادا کە نزیک دەبینەوە لە جەژنی قوربان  جەختیشیکردەوە، پێویستە لەکاتی خواردنی گۆشتدا زۆر بە باشی بشۆردرێتەوە و بکوڵیندرێت.

 باسی لەوەشکرد، گواستنەوەی ڤایرۆسەکە زۆر خاوە و لە رێگای هەناسەدانەوە ناگوازرێتەوە.

 ئەوەش لە دوای ئەوەدێت وەزارەتی تەندروستی و ژینگەی عێراق، تۆمارکردنی 8 کەسی بە نەخۆشی تای خوێنبەربوون لە دوو هەفتەدا راگەیاند، سێ تووشبوویان لە پارێزگاکانی کەرکووک و زیقاربوون و گیانیان لەدەستداوە. 

ر.ر