مەودا میدیا-

سەرۆك كۆماری توركیا هەڕەشەی دەركردنی باڵیۆزانی 10 وڵاتی رۆژئاوا دەكات، لەدوای ئەوەی ئەو وڵاتانە لە بەیاننامەیەکی هاوبەشدا داوایان لە توركیا كرد، بەشێوەیەكی دادپەروەرانە، لێكۆڵینەوە لە دۆسیەی (عوسمان كاوالا) بازرگان و چالاكوانی تورك بكەن.

لە لێدوانێکی رۆژنامەوانیدا رەجەب تەیب ئەردۆغان، سەرۆك كۆماری توركیا رەخنەی لە بەیاننامەی 10 وڵاتی رۆژئاوا گرت كە داوایان لە ئەنقەرە كردبوو، بەشێوەیەكی دادپەروەرانە لێكۆڵینەوە لە دۆسیەی بازرگانە توركەكە بكەن.

ئەردۆغان لە كاتی گەڕانەوەی لە ئەفریقا، بە رۆژنامەنوسانی راگەیاند، مافی ئەو وڵاتانە نییە دەست لە كاروباری ناوخۆی توركیا وەربدەن و بەو شێوەیە، ناتوانن بوونی دیپلۆماتكارەكانیان لە توركیا قبوڵ بكەن.

چەند رۆژێك لەمەوبەر، كەنەدا، فەڕەنسا، فینلاند، دانیمارك، ئەڵمانیا، هۆڵندا، نیوزلەندا، نەرویج، سوید و ئەمەریكا لە بەیاننامەیەكی هاوبەشدا داوایان لە توركیا كرد، بەشێوەیەكی دادپەروەرانە، لێكۆڵینەوە لە دۆسیەی "عوسمان كاوالا" بازرگان و چالاكوانی تورك بكەن كە ماوەی چوار ساڵە زیندانی كراوە.

ر. ر