مەودا میدیا-

ئەندامێکی پەرلەمانی كوردستان رایگەیاند، ساڵانە 90 ملیار دینار زیان لە پارەی خەڵك و داهاتی حكومەت دەدرێت، داوا لە هاوڵاتییان دەكات پارەی سزای نایاسایی نەبەستنی پێوەر و تەنانەت پارەی ئاویش نەدەن.

دابان محەمەد، ئەندامێی پەرلەمانی كوردستان لە تۆڕی كۆمەڵایەتیی فەیسبوک نووسیویەتی، یەك ملیۆن هاوبەشی ئاو لە هەرێم هەیە، هەر ماڵێك 10 هەزار دینار مانگانە پارەی ئاو بدات مانگی 10 ملیار دینار و ساڵی 120 ملیار دینار دەكات، بە دانپێدانانی حكومەت ئێستا ساڵی 35 ملیار دینار پارەی ئاویان پێ كۆدەكرێتەوە، واتە ساڵانە 90 ملیار دینار زیان لە پارەی خەڵك و داهاتی حكومەت دەدرێت.

ئەوەشی خستووەتەڕوو، زیاتر لە 90 ملیار دینار ساڵانە زیان لە پارەی خەڵك و داهاتی حكومەت لەو كاتەوە دەست پێ دەكات، كە پرۆسەی شكستخواردوی سیستمی پێوەر و خوێندنەوەی هێنرا و پارەی ئاوی پێ كۆكرایەوە لە پێناو بەرژەوەندی چەند كەسێك.

باسی لەوەشكردووە، ئەو ژمارانەی پارەی ئاو بۆ خەڵك هاتوەتەوە حەقیقی نین و  چوار خولە كۆمپانیاكان پێوەریان نەخوێندووەتەوە، هەبوونی راوەستانی بەردەوام لەنێوان خولەكاندا زەرەرمەندی سەرەكی هاوڵاتییان بووە و پارەیەكی زیاتریان بۆ هاتووەتەوە، داوا لە هاوڵاتییان دەكات پارەی سزای نایاسایی نەبەستنی پێوەر هیچ، بەڵكو پارەی ئاویش نەدەن.

ر. ب