مەودا میدیا-

بە پێی نوێترین ریزبەندی کە لەلایەن کۆمپانیای ھێنلی ئاند پاتنەرس بۆ باشترین پاسپۆرتەکانی جیهان لە ساڵی 2022دا ئەنجامدراوە، پاسپۆرتی عیراقی لە ریزبەندی خراپترین پاسپۆرتەکانی جیهاندایە و ژاپۆن و سەنگافوور خاوەنی بەهێزترین پاسپۆرتی جیهانن.

 کۆمپانیای Henley & Partnersی کە کۆمپانیاییەکی تایبەت بە راوێژکاری و رەگەزنامە و نشینگە لە جیهاندا ریزبەندییەکەی ئەنجامیداوە و بەو پێیە، ژاپۆن و سەنگافوور خاوەنی بەهێزترین پاسپۆرتەکانی جیهانن، کە لەلایەن 192 وڵاتی جیهانەوە رێگەپێدراون و بە بێ وەرگرتنی ڤیزا دەتواندرێت سەفەریان بۆ بکرێت.

هەر بە پێی ریزبەندییەکە کۆریای باشوور و ئەڵمانیا لە پلەی دووەمی پاسپۆرتە بەهێزەکانی جیهاندان بە بوونی 190 خاڵ، هەروەها فنلەندا، ئیتاڵیا، لۆکسمبۆرگ و ئیسپانیا بە 189 خاڵ.

لە بەرامبەردا ئەفغانستان خاوەنی خراپترین پاسپۆرتی جیهانە و کۆتا وڵاتە لە ریزبەندییەکەدا بەپێی ئەوەی بۆ زۆرینەی وڵاتانی جیهان پێویستی بە مۆڵەتپێدانی پێشوەختە، تەنها لەلایەن 26 وڵاتی جیهانەوە رێگەپێدراوە، هەروەها پێنج وڵاتی عەرەبی لە ریزبەندی خراپترین پاسپۆرتەکانی جیهاندان، عیراق یەکێکە لەو وڵاتانە بە 110 خاڵ، سوریا 109، یەمەن 107، سۆماڵ 106 و فەلەستین بە 105 خاڵ.

ر. ئ.