مەودا میدیا-

ئەندامێكی لیژنەی دارایی ئەنجومەنی نوێنەرانی عێراق رایدەگەیەنێت واژۆ لەسەر ناردنی پارەی مووچەی فەرمانبەرانی هەرێمی كوردستان كرا.

شیروان میرزا، ئەندامی لیژنەی دارایی لە ئەنجومەنی نوێنەرانی عیراق بە مەودا میدیای راگەیاند "مووچەی فەرمانبەرانی هەرێمی كوردستان لە لایەن وەزیری دارایی حكومەتى عیراق واژۆی ناردنی لەسەركراوە و بەمزوانە دەگاتە هەرێمی كوردستان".

وتیشی "گرفتێك لە ناردنی مووچەی فەرمانبەران نەبوو، تەنها رۆتینیاتە و هەموو مانگێك ئەوە دووبارە دەبێتەوە، بەپێی یاسای عیراقیش پارە لەدوای 18ی مانگەوە بڕیاری لەسەر دەدرێت و دابەش دەكرێت بەسەر پارێزگاو یەكە ئیدارییەكان".

بەپێی زانیارییەكانی مەودا میدیا بڕیارە سبەی یەكشەممە لەگەڵ دەستپێكی دەوام حكومەتی عیراق پارەی مووچەی فەرمانبەران بخاتە سەر حسابی هەرێمی كوردستان ئەگەر ئەو دۆخەی ئێستا عیراق گرفت دروست نەكات.

 مانگانە حكومەتی عیراق بڕی 454 ملیار دینار وەك مووچەی فەرمانبەرانی هەرێمی كوردستان رەوانە هەرێم دەكات.