مەودا میدیا-

بزووتنەوەی ئەلقاعیدە هەڕەشەی تووند لەو كەسانە دەكات كەوا سوكایەتی بە پێغەمبەری ئیسلام (درودی خوای لەسەربێت) دەكەن و رایدەگەیەنێت ژیان و ئارامییان پارێزراو نابێت، ئەوەشی وتووە كە تۆڵەی تووند لەو كەسانە دەكەنەوە بێڕێزی بە پێشەواكەیان دەكەن.

لە بەیاننامەیەكدا كە ئەمڕۆ چوارشەممە 8ی حوزەیرانی 2022 بڵاوكرایەوە، بزووتنەوەی ئەلقاعیدە نووسیویەتی "ئەوانە سووكایەتی بە پێغەمبەر محەمەدی شانازیی مرۆڤایەتی دەكەن، نە لێیان دەبوورین و نە بەزەیشیمان پێیاندا دێتەوە".

بزووتنەوەی ئەلقاعیدە هەڕەشەكەی زیاتر تووندكردووەتەوە و رایگەیاندووە "ژیانی ئەوانە لە ئارامیدا نابێت كە سوكایەتی بە پێغەمبەر دەكەن، هەروەها سوكایەتیكردن تەنها بە بەیاننامەیەكی سەركۆنەكردن و دەربڕینی چەند وشەی دڵگرانین كۆتایی نایەت"، ئاماژەی بەوەشكردووە "ئەو جۆرە كەسانە نە لە ماڵەكانیان و نە لە سەربازگەكانیشدا پارێزراو نابن".

بزووتنەوەی ئەلقاعیدە داوای تۆڵەكردنەوەی كردووە و نووسیویەتی "ئاگاداری هەموو كەسە ئازا و پیسەكان دەكەینەوە، بەتایبەت تیرۆریستەكانی هندۆتفای داگیركەری هیند، كەوا ئێمە لەپێناو پاراستنی شكۆی پێغەمبەرەكەماندا دەجەنگین، سوورین لەسەر ئەوەی بمرین و بكوژین لەپێناو كەسێتی پێغەمبەرەكەماندا، هەر كەسێك قسە بە پەیامبەرەكەمان بكات دەیكوژین".

س.ر