مەودا میدیا-

ئەندامێكی ئەنجومەنی پارێزگای سلێمانی رایدەگەیەنێت كەسانێك كە دەستڕۆشتوون و خۆیان بە پلەدار دەزانن كرێكارانی پاككەرەوەی كۆمپانیاكان دەردەكەن و كەسی نزیكی خۆیان دەخەنە شوێنیان.

كاسترۆ مەعروف، ئەندامی ئەنجومەنی پارێزگای سلێمانی و سەرۆكی لیستی هاوپەیمانی نیشتمانی بە مەودا میدیای راگەیاند "ماوەیەكە دیاردەیەك دروستبووە، كرێكارەكانی پاككەرەوە لە سنوری سلێمانی لەلایەن كەسانێك كە پێگەیان هەیە و خۆیان بە پلەدار دەزانن دەردەكرێن و كەسی نزیكی خۆیان دەخەنە شوێنی كرێكارەكان".

ئەوەشی خستەڕوو "پێشتر وەك حاڵەت بوو، بەڵام ئێستا بوەتە دیاردەو لە تەواوی ناوچەكان ئەو دیاردەیە هەیە، ئەمەش ترسی لای كرێكاران دروستكردووە و ناكرێت كەسانی فەقیر و هەژار لاببرێن".

وتیشی "ئەگەر كرێكارەكە كارێكی گەورەی نایاسایی كردبێت كێشە نابێت كەسی تر بخرێتە شوێنی، بەڵام ئەگەر بابەتەكە دەركردن بێت و كەسی تر بخرێتە شوێنیان رێكاری یاسایی دەگرینەبەر بەرانبەر هەر كەسێك ئەو كارە بكات لەگەڵ كرێكارانی پاككەرەوە".