کوردستانی

رێكخه‌ری ژووری هه‌ڵبژاردنی بزووتنه‌وه‌ی گۆڕان: پێشنیازمان کردووە دەنگدانی تایبەت نەمێنێت

مەودا میدیا - سلێمانی |


 رێكخه‌ری ژووری هه‌ڵبژاردنی بزووتنه‌وه‌ی گۆڕان: پێشنیازمان کردووە دەنگدانی تایبەت نەمێنێت
مەودا میدیا- سازگار ئەحمەد

 رێكخه‌ری ژووری هه‌ڵبژاردنی بزووتنه‌وه‌ی گۆڕان رایدەگەیەنێت وەکو بزووتنەوەی گۆڕان ستراتیژ و ئامانجمانە و لەگەڵ ئەوەین هەمیشە ئەنجامدانی هەڵبژاردنێکی پاک و بێگەرد لە کات و ساتی خۆیدا بەڕێوەبچێت، ئەوەشی خستەڕوو پێشنیازمان خستوەتەڕوو کە‌ دەنگدانی تایبەت نه‌مێنێت.

یاسین حه‌مه‌عه‌لی، رێكخه‌ری ژووری هه‌ڵبژاردنی بزووتنه‌وه‌ی گۆڕان بە مەودا میدیای راگەیاند "وەکو بزووتنەوەی گۆڕان ستراتیژ و ئامانجمانە و لەگەڵ ئەوەین هەمیشە ئەنجامدانی هەڵبژاردنێکی پاک و بێگەرد لە کات و ساتی خۆیدا بەڕێوەبچێت، سەرجەم ئەو پێشنیازانەشی بۆ هەمواری یاساکە خستومانەتەڕوو لە خزمەتی ئەوەدایە پرۆسەیەکی هەڵبژاردنی پاک و بێگەرد بەڕێوەبچێت".

ئاماژەی بەوەشکرد "بەردەوام بە پەرۆشەوە بەشداری کۆبوونەوەکان دەکەین، هاوکار دەبین لەپێناو تێپەڕاندنی لەمپەرەکان و گەیشتن بە لێکتێگەیشتنی هاوبەش لەسەر هەردوو پرسی یاسای هەڵبژاردنی پەرلەمانی کوردستان و کاراکردنەوەی کۆمسیۆنی باڵای سەربەخۆی هەڵبژاردن و راپرسی، وەکو ئاشکرایە ئەم دوو پرسە رەهەندی نیشتمانییان هەیە و پێویستی بە سازانی نیشتمانییە".

ئەوەشی خستەڕوو "ئێمە سورین لەسەری ئه‌وه‌ی تۆماری بایۆمیتری دەنگدان لە کۆمسیۆنەکەی بەغدا وەربگیرێت و بکرێتە بنەما و زۆرینەی لایەنەکان له‌گه‌ڵ ئێمه‌دا له‌مه‌دا هاوڕان، هەروەها له‌گه‌ڵ ئه‌وه‌داین بازنەکانی هەڵبژاردن چوار بازنە بێت و سیستمی دەنگدان سیستمی تێکەڵ بێت (سویدی) و پێشنیازمان خستوەتەڕوو کە‌ دەنگدانی تایبەت نه‌مێنێت و کۆمسیۆن دەتوانێت بە میکانیزمێکی گونجاو رێکیبخات".

سەبارەت بە پێكهاته‌ی کۆمسیۆن یاسین حەمەعەلی وتی "له‌گه‌ڵ ئه‌وه‌داین پارێزگاری لەو پشك پشكێنه‌ی ئێستا بکرێت و وەکو خۆی بمێنێتەوە، بەڵام ماف بدرێت بە لایەنەکان و گۆڕانکاری لە نوێنەرەکانی خۆیاندا بکەن و کەلێنەکان پڕبکەنەوە".

س.ر
Qaiwan
Qaiwan