مەودا میدیا-

وه‌زاره‌تی ته‌ندروستیی عیراق چاكبوونه‌وه‌ی 15 تووشبووی ڤایرۆسی كۆرۆنای راگه‌یاند کە 4 حاڵەتیان لە پارێزگای کەرکوک بووە و ئەوانی دیکەش لە بەغدان.

سه‌یف به‌در، وته‌بێژی وه‌زاره‌تی ته‌ندروستیی و ژینگه‌ی عیراق ئاشكرایكرد "تا ئێستا 15 كه‌سی تووشبووی ڤایرۆسی كۆرۆنا له‌ وڵات چاك بوونه‌ته‌وه‌".

ئاماژەی بەوەشکرد "11 حاڵه‌ت له‌ پارێزگای به‌غدا، كه‌ 7 حاڵه‌ت له‌ ناوچه‌ی كه‌رخ و 4 حاڵه‌تیش له‌ به‌ری رەسافه‌ی ئه‌و شاره‌ بوون و 4 حاڵه‌تیشیان له‌ پارێزگای كه‌ركوك بوون".

باسی لەوەشکرد "وه‌زاره‌تی ته‌ندروستیی و ژینگه‌ی عیراق جه‌خت له‌سه‌ر پابه‌ندبوونی خۆی به‌ رێنماییه‌ ته‌ندروستییه‌ نێوده‌وڵه‌تییه‌كان ده‌كاته‌وه، له‌ مامه‌ڵه‌كردن له‌گه‌ڵ حاڵه‌ته‌ پشتڕاستكراوه‌كان و گومانلێكراوانی تووشبوون به‌و ڤایرۆسه‌‌".

ئەوەشی خستووەتەڕوو "ئه‌و نه‌خۆشانه‌ی كه‌ره‌نتینه‌ كراون له‌لایه‌ن دامه‌زراوه‌كانی سه‌ر به‌ وه‌زاره‌ت هه‌موو پێداویستییه‌ پزیشكییه‌كانیان بۆ دابین كراوه‌".