وەزارەتی بازرگانیی عیراق رایگەیاند بەنیازین بەبۆنەی مانگی رەمەزانەوە چوار بابەتی نوێ بخەینە ناو سەبەتەی خۆراکەوە، ئەوانیش بریتیین لە ئاردی سفر، نیشاستە، شه‌عریه‌ و شیر.

ئه‌مڕۆ پێنجشه‌ممه‌ 25ی کانوونی دووەمی 2024 محەمەد حەنون، وتەبێژی وەزارەتی بازرگانیی عیراق رایگه‌یاند، وەزارەتەکەی هەوڵدەدات سەقامگیریی سەبەتەی خۆراک مسۆگەر بکات، بەو پێیەی خاوەنی گەنجینەیەکی ستراتیژیی گەنم و خۆراکە، ئاماژەی به‌وه‌ش كرد وەزارەتەکەی بەنیازە بەبۆنەی مانگی رەمەزانەوە چوار بابەتی نوێ بخاتە ناو سەبەتەی خۆراکەوە، ئەوانیش بریتیین لە ئاردی سفر، نیشاستە، شه‌عریه‌ و شیر، كه‌ بە کۆی گشتی دەبێته‌ 10 جۆره‌ خۆراك.

ئاماژەی بۆ ئەوەش کرد نرخی بەرهەمەکانی وەک گۆشت، مریشک، هێلکە، ئارد، شەکر، زەیت و شیری داناوە و وەزارەته‌كه‌ی سەرجەم کەلوپەلی خۆراکی بە نرخێکی پاڵپشتی فرۆشتووە، ئەمەش ئاماژەیە بۆ ئەوەی ئامانجی ئەم هەنگاوە رێگریکردنە لە بازرگانان لە قۆرخكردن و ئیستغلالکردنی هاوڵاتییان و دڵنیابوون لە سەقامگیریی نرخ.

گ.ع