مه‌ودا میدیا-

نرخی كارەبای مۆلیدەی بۆ مانگى شوبات لە سلێمانی دیاریكرا و نرخی یه‌ك ئه‌مپێر له‌ ناو شار له‌نێوان (12.000) بۆ (13.000) دیناردایه‌، و خشته‌ى كار پێكردنی مۆلیده‌كانیش بۆ مانگى ره‌مه‌زان ده‌گۆڕێت. 
 
بەڕێوەبەرایەتی گشتیی كارەبایی سلێمانی رایگه‌یاندووه‌، ئه‌مڕۆ یه‌ك شه‌ممه‌ 3-3-2024  لیژنه‌ی دیاریكردنی نرخی موەلیدە ئه‌هلییه‌كان کۆبوونەوە و به‌پێی نرخی سوته‌مه‌نی له‌ بازاڕه‌كاندا، نرخی هه‌ر كاتژمێرێك بۆ یه‌ك ئه‌مپێر (41) دینارە،‌ به‌مه‌ش نرخی یه‌ك ئه‌مپێر كاره‌بای موه‌لیده‌ی ئه‌هلی له‌ ناو شاری سلێمانی له‌نێوان (12.000) بۆ (13.000) دیناردایه‌، بەو پێیەى موەلیدەکان لە نێوان (285 بۆ 320) کاتژمێر کاریان کردووە، به‌هۆی جیاوازی كارکردنیان، نرخی ئه‌مپێرێك كاره‌بای موه‌لیده‌ی گه‌ڕه‌كێك بۆ گه‌ڕه‌كێكی دیكه‌ جیاواز ده‌بێت.
 
روونیشیكردووه‌ته‌وه‌، هەندێک شوێن بەرنامەى کارکردنى موەلیدەکانیان لە (7)ى بەیانى بۆ (1)ى شەوە، نرخى ئەمپێریان (16.000 بۆ 17.000 ) دینارە.
 
ئاماژه‌ى به‌وه‌شداوه‌، ئەو موەلیدانەش کە کارکردنیان 24 کاتژمێرییە نرخى ئەمپێریان (20.000) دینارە.
 
له‌باره‌ى خشته‌ى كار پێكردنى مۆلیده‌كانیش، ئه‌وه‌ى خستووه‌ته‌روو، خشته‌ی كارپێكردنی موه‌لیده‌ بۆ مانگى (ئادار) تا 10-3-2024 لەنێوان 1ى پاشنیوەڕۆ تا 1ى شەو ئەگەر کارەباى نیشتمانى کوژایەوە کار دەکەن، بەیانیانیش لەکاتژمێر :6:30 تا 8:00 ى بەیانى کاردەکەن، له‌ مانگی رەمەزانی پیرۆزدا خشته‌ی كاركردنیان ده‌گۆڕێت.
 
لیژنه‌ی دیاریكردنی نرخی موه‌لیده‌ ئه‌هلییه‌كان، باس له‌وه‌شده‌كات، له‌كاتی كوژاندنه‌وه‌ی كاره‌بای نیشتمانی نابێت كارپێكردنی موه‌لیده‌ و پێدانی كاره‌با به‌هاوڵاتییان له‌ (10) خوله‌ك زیاتر بخایه‌نێت، به‌پێچه‌وانه‌وه‌ خاوه‌ن موه‌لیده‌كه‌ سزا ده‌درێت.

رۆژانى هەینى و شەممە و پشووە فەرمییەکان بەیانیان کارناکەن لەبرى ئەوە کاتژمێر 11ى پێشنیوەڕى بۆ 1ى شەو کاردەکەن.
 

پ ح ع