مه‌ودا میدیا-

بەڕێوەبەرایەتی ئاوی سلێمانی، چاككردنه‌وه‌ى شکانی بۆری ئاوی دووکان – سلێمانی راده‌گه‌یه‌نێت و  ده‌ڵێت، سبەینێ دابەشکردنی ئاو بۆ گه‌ڕه‌كه‌كانى شاره‌كه‌ دەستپێدەکاتەوە.

لەراگەیەندراوێکدا كه‌ ئه‌مڕۆ پێنج شه‌ممه‌، بڵاویکردووەتەوە، به‌رێوه‌به‌رایه‌تى ئاوى سلێمانى ئاماژه‌ به‌وه‌ده‌كات، بەهۆی ئەو شەپۆلە بارانبارینەی ماوەی چەند رۆژی رابردوو شاری سلێمانی گرتەوە و چەند جارێک بڕانی کارەبا لە پڕۆژەی ئاوی دووکان - سلێمانی روویدا و گرفت بۆ دابەشکردنی ئاوی هاوڵاتییانی شاری سلێمانی و قەزاو ناحیەکانی دەوروبەری درووست بوو، بووە هۆی شکانی بۆرییەکە.

ئه‌وه‌شى خستووه‌ته‌روو، تیمەکانی هێڵی دوو بەبەردەوامی لە ماوەی ۷۲ کاتژمێری کارکردنی بەردەوامی شەو و رۆژی بێ دابڕان توانرا بە هەوڵی هەموولایەک بۆرییەکە چاکبکرێتەوە.

ده‌شڵێت، بۆیه‌ بەیانی ئاو دەگاتەوە شاری سلێمانی و دەست بەدابەشکردنی ئاو دەکرێتەوە بۆ گەڕەکەکانی شاری سلێمانی بە تایبەت گەڕەکەکانی ناوچەی قڕگە و فەرمانبەران و سەروەری و کوردسات و ئەو گەڕەکەنەی کە تووشی کەم ئاوی بوون لەم چەند رۆژەی ڕابردوو.


پ ح ع