کوردستانی
پارێزه‌رێك: سۆشیال میدیاو خیانه‌ت بووه‌ته شێرپه‌نجه‌ى ژیانى هاوسه‌ران
مەودا میدیا - سلێمانی |
مه‌ودا میدیا-
پارێزه‌رێك باس له هۆكاره‌كانى جیابوونه‌وه‌ى ژن و مێر ده‌كات و ده‌ڵێت، چه‌ندین هۆكار هه‌یه وا ده‌كات ژن و مێرد له یه‌كتر جیاببنه‌وه، له‌وانه خیانه‌ت و پێنه‌دانى خۆشه‌ویستى به یه‌كتر.
پارێزه‌ر بێرى قادر، له‌و باره‌وه به مه‌ودا میدیاى راگه‌یاند "ساڵ به ساڵ جیابوونه‌وه‌ى ژن و مێر له زیادبووندایه و چه‌ندین هۆكاریش هه‌یه وا ده‌كات هاوسه‌رگیرى ژن و مێر هه‌ڵبوه‌شێته‌وه، ئه‌و هۆكارانه‌ش هه‌ر یه‌كه‌یان كێشه‌یه‌كى گه‌وره‌ى له‌پشته".
هه‌روه‌ها وتى "یه‌كێك له هۆكاره سه‌ره‌كییه‌كانى جیابوونه‌وه‌ى ژن و مێرد، مۆبایل و سۆشیال میدیايه، گه‌وره‌ترین گرفتى له‌نێوان هاوسه‌ران دروستكردووه و به‌شێكى زۆرى ئه‌و جیابوونه‌وانه‌ى رۆژانه تۆمارده‌كرێن بۆ سۆشیال میدیا ده‌گه‌ڕێته‌وه كه لاى ئێمه زۆر به‌شێوه‌یه‌كى خراپ به‌كارده‌هێنرێت".
وتیشى "هۆكارێكى ترى جیابوونه‌وه بۆ خیانه‌تكردن و پێنه‌دانى خۆشه‌ویستى به‌یه‌كتر ده‌گه‌ڕێته‌وه، رۆژانه چه‌ندان حاڵه‌تى جیابوونه‌وه به‌هۆی خیانه‌ت تۆمارده‌كرێت، هه‌روه‌ها لێكتێنه‌گه‌یشتن و رێزنه‌گرتنى یه‌كترى".
باسى له‌وه‌شكرد"هۆكارێكى تر هه‌یه بووه‌ته یه‌كێك له هۆكاره سه‌ره‌كییه‌كان به‌راوردكردنى ژیانى كه‌سانى ده‌وروبه‌ر به ژیانى خۆیان، ئه‌مه‌ش گرفتى گه‌وره‌ى دروستكردووه، هه‌روه‌ها ده‌ستوه‌ردانى كه‌سانى تر، رێزنه‌گرتنى یه‌كترى و نه‌بوونى متمانه‌ش هۆكارێكى تره".
ئه‌و پارێزه‌ره ئه‌وه‌شى خسته‌ڕوو "ئێستا شتێكى تریش په‌یدابووه كه له‌ناو تۆمارى جیابوونه‌وه‌ى هاوسه‌ران تۆمارده‌كرێت ئه‌ویش نه‌بوونى ماڵى سه‌ربه‌خۆ، ئه‌وه‌ش هۆكارێكى ترى جیابوونه‌وه‌ى هاوسه‌رانه".
ع،ه
بیروڕا
