مەودا میدیا-

د.هه‌ڤاڵ ئه‌بوبه‌كر پارێزگاری سلێمانی رایگەیاند "بابه‌تی ته‌وتینی مووچەی فەرمانبەرانی هەرێمی کوردستان له‌لایه‌ن دادگای فیڕداڵییه‌وه‌ بڕیاری لێدراوه‌".

ئاماژەی بۆ ئەوەشکرد "پێویستە هەردوو سه‌رۆك وه‌زیرانی عیراق و سه‌رۆك وه‌زیرانی هه‌رێم بڕیار لە تەوتین بدەن، چونکە بابه‌تێكی یاسایی و كارگێڕی و داراییە و نابێت بكرێتە ململانێی سیاسیی، تاوەکو خه‌ڵك نه‌بێتە قوربانی ململانێكان".

ئەوەشی خستەڕوو "بە هیوایە، مووچه‌ سوڕی 30 رۆژه‌ی خۆی وه‌ربگرێته‌وه‌ و خه‌ڵك پاره‌ و كاره‌كه‌ی پارێزراو بێت، تاوەکو بتوانێت سوودمه‌ند بێت له‌و ئۆفه‌رانه‌ی بانكه‌كان پێشكه‌شی ده‌كه‌ن، خانه‌نشینان و مووچه‌خۆران مافه‌كانیان پارێزراو بێت".

باسی لەوەشکرد "گرنگە فەرمانبەر بتوانێت به‌ كارتێكی ئه‌لیكترۆنی بە خواستی خۆی مووچه‌كه‌ی وه‌ربگرێت و هیچ كه‌سێك نه‌توانێت لێی ببڕێت و كه‌می بكات و بیكات به‌ مه‌كره‌مه‌ و به‌ خێر".

لێدوانەکەی پارێزگاری سلێمانی لە کاتێکدایە، رۆژی 2024/11/17، جێگری پارێزگاری سلێمانی بە نووسراوێكی فەرمی داوای لە بانكی ناوەندی عیراق کرد  تەوتینی مووچەی فەرمانبەرانی سنووری پارێزگاکە دەستپیبکات.

ب ح