مه‌ودا میدیا-

دەزگای ئاسایشی هەرێم چەند رێنماییەک بۆ بەکارهێنەرانی کارتە بانکییەکان بڵاوده‌كاته‌وه‌ و رایده‌گه‌یه‌نێت "لە کاتی گەشتەکانیاندا لە فڕۆکەخانە و دەروازە سنورییەکان ده‌بێت ره‌چاو بكرێن".

له‌و باره‌یه‌وه‌ لە راگەیەندراوێکدا دەزگای ئاسایشی هەرێمى كوردستان بڵاویكردووه‌ته‌وه‌ "گەشتیار جگە لە کارتی بانکی خۆی نابێت هەڵگری هیچ کارتێکی تربێت، بە پێچەوانەوە تۆمەتبارە بەیاسای سپیکردنەوەی دراو و پارەدارکردنی تیرۆر ژمارە(39ی ساڵی 2015)".

راشیگه‌یاندووه‌ "ئەگەر گەشتیار هەڵگری چەند کارتێکی بانکیی بوو کە بەناوی خۆییەوە نەبوو، گەشتیار و خاوەنی کارتەکان بەرپرسیارن بەرانبەر بە یاسا و کارتە بانکییەکان دەستی بەسەردا دەگیرێت و بلۆک دەکرێن".

له‌ راگه‌یه‌ندراوه‌كه‌دا ئه‌وه‌ش هاتووه‌ "کڕینەوە یان بەکرێدانی کارتە بانکییەکان کارێکی نایاسایی یە، بە پێچەوانەوە مامەڵەکار و خاوەنی کارتەکە رووبەووی یاسا دەکرێنەوە، هه‌روه‌ها داواکارین لە هاوڵاتییان پارێزگاری لە بەڵگەنامە کەسییەکانیان بکەن، رێگە نەدەن بەکار بهێندرێت بۆ ئەم مەبەستە".

پ ح ع