مەودا میدیا- سازگار ئەحمەد

قەزای شەنگالیش بەهەمان شێوەی شارەکانی دیکەی هەرێمی کوردستان بڕیاری قەدەغەی هاتووچۆ گرتوویەتیەوە و  بەرپرسی هێزی پاراستنی ئێزدخان لە شەنگال رایدەگەیەنێت تاوەکو ئێستا هێچ حاڵەتێکی تووشبوون بە ڤایرۆسی کۆرۆنا لە شنگال تۆمار نەکراوە.

حەیدەر شەشۆ، بەرپرسی هێزی پاراستنی ئێزدخان لە شەنگال بە مەودا میدیای راگەیاند "دانیشتووانی شەنگال بەشێوەیەکی باش پابەندی ئەو رێنماییە تەندروستییانەن کە لەلایەن حکومەتی هەرێمی کوردستان و وەزارەتی تەندروستییەوە بڵاوکراونەتەوە بۆ رێگریکردن و خۆپاراستن لە ڤایرۆسی کۆرۆنا".

ئاماژەی بەوەشکرد "جێگای خۆشحاڵییە تاوەکو ئێستا هێچ حاڵەتێکی تووشبوون بە ڤایرۆسی کۆرۆنا لە شنگال تۆمار نەکراوە ئەمەش دەگەڕێتەوە بۆ ئەوەی هاوڵاتییان پابەندن بە بڕیاری قەدەغەی هاتووچۆوە".