لەو سەروبەندەی کە خاتوو نەرمین عوسمان، وەزیری کاروباری ژنان بوو لە کابینەکەی بەڕێز ئەیاد عەلاوی،  سەرۆک وەزیرانی عیراق، لە یەکێک لە کۆبوونەوەکان دێتە سەرەی ئاخاوتنی و زۆر بەوردی و جدی لەسەر بابەتەکانی کۆبوونەوەکە دەدوێت کە دەرهێنانی پاسپۆرت بۆ ژن و بردنی مەحرمەم بووە، بەشێک لە پیاوانی کۆبوونەوەکە لەژێر دەمی خۆیان و هەندێکیان بە دەنگی ناسازیان (ژاوەژاو)ێک دروستدەکەن وەک ئەوەی نەهێڵدرێت قسەکان و پەیامەکە وەک خۆی بگات یان پێشتر نەبووە و نەکراوە ژن لەو کۆڕ و کۆبوونەوانەدا بەو شێوەیە قسە بکات.

لە بەرانبەردا و بە دان بەخۆداگرتنی، بەڕێز نەرمین عوسمان بەردەوام دەبێت هەتا  هەڵوەستەیەک دەکات و دەنگی دلێرانە و جوامێرانەی بەرزتر دەکاتەوە و بە هەردوو دەستی دەکێشێت بەسەر مێزەکەدا و بێدەنگی و خامۆشییەک سەراپای هۆڵەکە دادەگرێت، کش و مات، پێیان بەیان دەکات:  ئێرە کۆبوونەوەیە لە دامەزراوەیەکی رەسمیدا، ناو ماڵبات و دیوەخان نییە رێگە نەدرێت ژنان رۆڵ و قسەی خۆیان هەبێت، لەوە بەدواوە مۆدێلێک هاتە ئاراوە لە کۆڕ و کۆبوونەوەکان ژنان پێش پیاوان دەخران.

نمونەی ژنی شۆڕەسوار و جوان و جوامێر لە دیرۆکی کوردایەتیدا فرەن و نموونەن بۆ نەوەکانی ئێستا و داهاتوومان.

‎*ژاوەژاو: ئەو دەنگە ناشازانەیە کە مرۆڤ بێزار دەکات و کۆئەندامی بیستن توانای وەرگرتنی نییە یاخود، بریتییە لە دەنگێک یان چەند دەنگێکی تێکەڵ بەیەک بوو، کە مانایەکی ئاشکرا و دیاریکراویان لێ بەدەست ناهێنرێت، زۆر جار ژاوەژاو بە یەکەی دیسیبل – Decible دەپێورێت.

ر.س