مه‌ودا میدیا-

له‌ ماوه‌ى دوو ساڵى رابردوو، دواى گۆڕانكارییه‌ جیهانییه‌كان، خواستى زۆر له‌سه‌ر ئاڵتوون به‌رزبووه‌ته‌وه‌ و له‌و چوارچێوه‌یه‌شدا خواستى زۆر له‌سه‌ر لیره‌ى خه‌لیجى "دوبه‌ى" زۆر بووه‌ و خه‌ڵكێكى زۆر به‌ ئامانجى قازانج په‌ناى بۆ ده‌به‌ن و ده‌یكڕن.

له‌ماوه‌ى ساڵى 2023 كاتێك ئاڵتوون له‌ خوار دوو هه‌زار دۆلار بۆ هه‌ر ئۆنسه‌یه‌ك ده‌ستیكرد به‌ به‌رزبوونه‌وه‌ كرد، هاوڵاتییان تا قازانج بكه‌ن وه‌ك كارێكى بازرگانیی، ده‌ستیان كردووه‌ به‌ كڕینى لیره‌ى خه‌لیجى عه‌یاره‌ 22ى و 7 گرامى، هۆكاره‌كه‌ش ئه‌وه‌یه‌، له‌ لایه‌ك هه‌ق ده‌ستى زۆر كه‌مه‌ كه‌ ته‌نها 5 دۆلاره‌، هه‌روه‌ها له‌گه‌ڵ ئه‌وه‌ى كه‌مێك ئاڵتوون له‌ بۆرسه‌ به‌رزبووه‌وه‌ قازانج ده‌كات.

زه‌ڕه‌نگه‌رى ژیر بڵاویكرده‌وه‌ "به‌هۆى ئه‌و خواسته‌ زۆره‌ى له‌سه‌ر زێر و به‌تایبه‌ت لیره‌ى دوبه‌ى جۆرى جه‌لیجى دروستبووه‌، رۆژانه‌ خه‌ڵكێكى زۆر ئه‌و لیره‌یه‌ ده‌كڕن و خواستێكى زۆر له‌سه‌ر هه‌یه‌".

وتیشى "هه‌فتانه‌ 10 هه‌زار لیره‌ى خه‌لیجى "دوبه‌ى" عه‌یاره‌ 22 ده‌هێنرێنه‌ شارى سلێمانى و ساغده‌كرێنه‌وه‌، هه‌روه‌ها له‌به‌رانبه‌ردا هه‌فتانه‌ 5 ته‌ن زیو ده‌هێنرێته‌ شارى سلێمانى".

باسى له‌وه‌شكرد "له‌گه‌ڵ هێنانى ئه‌و هه‌موو لیره‌یه‌ هه‌فتانه‌، به‌ڵام زۆرجار لای زێڕینگه‌ره‌كان لیره‌ ده‌ستناكه‌وێت".

محه‌مه‌د جاسم، زه‌ڕینگه‌ر به‌ مه‌ودا میدیاى راگه‌یاند "نرخى زێڕ دابه‌زینى به‌رچاوى به‌خۆوه‌ بینى له‌ چوار رۆژى رابردوو، ئه‌مه‌ وایكرد خه‌ڵكێك بترسێت له‌وه‌ى زیاتر دابه‌زێت، بۆیه‌ په‌نایان برده‌ به‌ر فرۆشتنى ئه‌و لیرانه‌ى له‌ رابردوو كڕیبویان".

وتیشى "له‌ لایه‌كى تریشه‌وه‌، ئه‌وانه‌ى نیازى كڕینیان هه‌بوو، به‌ڵام نرخه‌كه‌ له‌ به‌رزیدابوو، كاتێك دابه‌زى، ده‌ستبه‌جێ ده‌ستیان به‌ كڕین كرد، له‌ هه‌ردوو باره‌كه‌دا خه‌ڵك هاتنه‌ ناو بازاڕى زێڕینگه‌ران و كڕین و فرۆشتنیان كرد، هۆكارى خواستى زۆر له‌سه‌ر لیره‌ ئه‌وه‌یه‌ كه‌ هه‌ق ده‌ستى كه‌مه‌ و به‌رزبوونه‌وه‌یه‌كى كه‌م ده‌بێته‌ هۆ قازانج، پێچه‌وانه‌ى ئاڵتوون كه‌ هه‌ق ده‌ستێكى زۆرى هه‌یه‌".

ع