مەودا میدیا-

بڕیارە دوای بەڕێوەچوونی دووەمین دیداری یەکێتی پرۆسەیەکی گۆڕانکاریی گشتگیر لە مەکتەب و مەڵبەند و ئۆرگانە جیاوازەکانی یەکێتی نیشتمانی کوردستاندا ئەنجامبدرێت.

بەرپرسێکی یەکێتی لە مەکتەبی رێکخستن بە مەودا میدیای راگەیاند "پڕۆژەیەکیان بۆ گۆڕانکاریی لە هەیکەلی مەڵبەندەکان و ژمارەی کۆمیتەکان ئامادەکردووەو بۆ ئەو مەبەستە لەگەڵ ئەنجومەنی مەڵبەندەکان کۆبوونەتەوەو دوای دیداری یەکێتی پڕۆژەکەیان ئاڕاستەی ئەنجومەنی سەرکردایەتی دەکەن و دواتر بڕیاری لەسەر دەدرێت".

ئاماژەی بۆ ئەوەشکرد "پڕۆژەکەیان بریتییە لە کەمکردنەوەی ئۆرگانەکانی یەکێتی بەشیوەیەک مەڵبەندەکان تەنها لەسەر ئاستی پارێزگا و ئیدارە سەربەخۆکان دەمێننەوەو کۆمیتەکانیش لە ناحیەکان دادەخرێن و دەخرێنە سەر قەزاکان بە مەرجێک ژمارەی دەنگدەرانی یەکێتی لەسنووری قەزاکان لە پێنج هەزار دەنگدەر کەمتر نەبێت بە پێچەوانەوە دادەخرێت".

ئەوەشی خستەڕوو "ئامانج لە کەمکردنەوەی ژمارەی مەڵبەندو کۆمیتە و ئۆرگانەکان کەمکردنەوەی خەرجییەکان و رێکخستنەوەی هەیکەلی کاری حزبیە لە سەرتاسەریی هەرێمی کوردستان و خۆگنجاندنە لەگەڵ گۆڕانکارییەکان و کردنەوەی ئۆرگانی نوێ کە بگونجێت لەگەڵ کاری رێکخراوەیی سەردەم".

ب ح