وێنە گەورەکە:

راپەڕینی۱۳ ـی ٥ ـی ۱۹٨۷ـی دەڤەری شارەزوور.

رۆژی۱۳ ـی ٥ ـی ۱۹٨۷ هاوکات ۱٤ی مانگی رەمەزان بوو، خەڵکی دەڤەری شارەزوور راپەڕینیان بەرپا کرد، راپەڕینەکە سەرەتا لە سەیدسادقەوە سەرچاوەی گرت و هەتا هەڵەبجەی گرتەوە (هەڵەبجە،سەیدسادق،خورماڵ،سیروان) رێکخستنی سەرجەم حزبە کوردستانییەکانی ئەوکات هەڵسوڕێنەر و بزوێنەری سەرەکی راپەڕینەکەبوون، لەبەرئەوە دەکرێت بڵێین راپەڕینێکی خۆڕسکی جەماوەریە و هیچ هێزێک بەتەنها خاوەنداری ناکات.

کار:

لەو کاتەدا حکومەتی عیراق دەستی کردبوو بە راگواستنی گوندەکانی شارەزوور بۆ ناو ئۆردوگا زۆرەملێکان و دەیویست لەم رێگەیەوە زیاتر پشت و پەنای شۆڕش و شۆڕشگێڕان لاواز بکات و گوندەکان لە ژیان، ژیار و شارستانی دوور بخاتەوە و دابڕان درووستبکات لە نێوان شۆڕش و گوندەکان.

کاردانەوە:

ئەم راپەڕینەی هەڵەبجە و سەیدسادق و دەڤەری شارەزوور راستەوخۆ بۆ بەرپەرچدانەوەی راگواستنی گوندەکانی شارەزوور ئەنجامدرا، خەڵکی ناوچەکە راپەڕینی جەماوەرییان بەرپاکرد، بەم راپەڕینە گیانی شۆڕشگێڕی کوردایەتی برەوپێدایەوە لە ناوچەکە و دەڤەری شارەزوور بەگشتی.

رووداو:

راپەڕینی جەماوەریی سەرجەم شارەکانی گرتەوە و رژێمی بەعسیش هێزێکی زۆری سەربازی هێنایە سنورەکە، بەشێوەیەک ناوچەکە بوو بە سەربازگەیەکی گەورە بەتایبەت شاری سەیدسادق، رژێم دەیویست بە هەر نرخێک هەیە کۆتایی بەم راپەڕینە بهێنێت و لە ئەنجامدا بە شێوەی هەڕەمەکی و بە مەبەستی بڵاوەپێکردن و کۆتایهێنان بەم راپەڕینە رژێم و سەربازەکانی بە تەقە وەڵامی خەڵکی دایەوە و لەئ ەنجامدا شاری سەیدسادق شەڕی رووبەڕووبوونەوە روویدا و ژمارەیەک سەربازی رژێم کوژران و برینداربوون.

زیانەکان:

لە خەڵکی راپەڕیووی ناوچەکە لە شاری هەڵەبجە (٦)کەسی مەدەنی شەهیدبوون و (١٧)کەسی برینداریش کە دواتر لە نەخۆشخانەی شاری هەڵەبجە پیاوانی بەعس دەستگیریان کردن و شەهیدیان کردن، لە شاری سەیدسادق (٥)کەس شەهیدبوون و (٢)کەسیش برینداربوون، لە نزیک گوندی (گردی گۆ) رژێم بۆسەی نایەوە و (٢٦) هاووڵاتی مەدەنی و بێتاوان دەستگیرکران، دواتر بران بۆ سەربازگەی لیوای سەیدسادق هەر لەوێش شەهیدکران، لە کاتێکدا ئەو هاووڵاتیانە بەڕۆژوو بوون، شایەنی بیرهێنانەوەیە لە ساڵی (١٩٩٥)لە شوێنی سەربازگەی سەیدسادق گۆڕی بەکۆمەڵی ئەو (٢٦)شەهیدە دۆزرایەوە، کە خەڵکی خوورماڵ و دەڤەری هەڵەبجە و هەورامان بوون.

کاردانەوەی حکومەتی عیراق:

لە تۆڵەی راپەڕینی۱٣ ـی ٥ ـی ۱۹٨۷ـی دەڤەری شارەزوور رژێمی بەعسی عیراقی و حکومەتەکەی نزیکەی (٣٠٠) خانووی لە هەڵەبجە رووخاند و هەروەها لە گەڕەکی (حەسار)ی شاری سەیدسادق ژمارەیەک خانووووی هاووڵاتیانی خاپوورکرد.

یەکێک لە چیرۆکەکان:

رژێمی بەعس، دکتۆرێکی بەزیندووی سوتاند❗

کارێکی نامرۆڤانە، بەرامبەر دکتۆرێکی مرۆڤ دۆست، یەکێک لە شەهیدەکانی راپەڕینەکەی سەیدسادق(جەمال جەلال عبداللە) ناسراو بە(دکتۆرجەمال) بەعس و جەللادەکانی بە زیندوویی سوتاندیان، دکتۆر جەمال، برینپێچ بوو، بەڵام خەڵکی سەیدسادقیش پێیان دەوت دکتۆر جەمال، خەڵکی سلێمانی بوو، بەڵام زیاد لە دە ساڵ بوو لە نەخۆشخانەی سەیدسادق دەوامی دەکرد و ماڵەکەشی هێنابووە سەیدسادق لە نزیک گردی تەپەڕەش، خەڵکی خۆشیان ئەویست و زۆر رێزیان لێدەگرت، رۆژی راپەڕینەکە پیاوانی رژێم رۆیشتنە ماڵی ناوبراو بەو بیانووەی بریندارەکانی تیمار کردوە و هاوکاری شۆڕشگێڕەکانی کردووە، بە شێوەیەکی نامرۆڤانە و دوور لە هەموو بەهایەکی ئینسانی قونبەلەیەکی کوشندەی جۆری (فاس) یان تێگرت و گڕیان بەردایە جەستەی دکتۆر جەمال بەزیندوویی، خەڵکی سەیدسادق و شایەتحاڵەکان لە کاتی ئەم کارە نامرۆڤانەیە زۆر هەوڵیاندا رزگاری بکەن، بەڵام نەیانتوانی جەستەی گڕگرتووی دکتۆر جەمال بکوژێننەوە و رزگاری بکەن، بەو شێوەیە دکتۆر جەمال، گیانی فیدای راپەڕینی جەماوەری سەیدسادق کرد، هاوکات سۆرانی کوڕیشی دەستگیر کرا و لەگەڵ کۆمەڵێکی دیکەی خەڵکی سەیدسادق قۆڵبەستیانکردن، بەڵام بە هەوڵی هەندێ کەسایەتی دەستڕۆشتووی ئەوکات ئازادکران.