بەیانی ئەمڕۆ شەممە 17ی ئایار، بە بەشداریی زیاتر لە ملیۆنێك خوێندكار تاقیكردنەوەی كۆتایی وەرزی دووەمی پۆلە ناكۆتاكان لە سەرجەم شار و شارۆچكەكانی هەرێمی كوردستان دەستپێكرد. 

ئەرسەلان پەرۆش، بەڕێوەبەری بەشی راگەیاندن و پەیوەندییەكانی بەڕێوەبەرایەتی پەروەردەی گەرمیان بە مەودا میدیای راگەیاند"ئەمڕۆ لە سەرجەم ناوەندەكانی خوێندن لە شاروشارۆچكەكانی هەرێمی كوردستان تاقیكردنەوەی خولی یەكەمی وەرزی دووەمی پۆلە ناكۆتاكان دەستیپێكردووە". 

وتیشی"كاتی تاقیكردنەوەكان بەپێی دەوام و كاتی خوێندنگە و قوتابخانەكان دەگۆڕێت و هەندێكیان بەیانیان و هەندێكیشیان نیوەڕوان تاقیكردنەوە ئەنجام دەدەن". 

ئاماژەی بۆ ئەوەشكرد"ئەمڕۆ هەریەك لە پۆلەكانی چوار، پێنج، شەش، حەوت، هەشت، 10 و 11 بەشداری تاقیكردنەوەكان دەكەن، بەڵام پۆلەكانی یەك، دوو و سێ تەنها بە هەڵسەنگاندن دەبێت و تاقیكردنەوەی سەر دەفتەریان نابێت".  
 
باسی لەوەشكرد"بەپێی ئامارەكانی وەزارەتی پەروەردە یەك ملیۆن و 387 هەزار و 895 خوێندكار بەشداری لە تاقیكردنەوەی پۆلە ناكۆتاكان دەكەن". 
ئ ح