مەودا میدیا-

بڕیارە ڕۆژی شەممەی هەفتەی داهاتوو، ئەنجوومەنی سەركردایەتی یەكێتیی نیشتمانیی كوردستان لە شاری سلێمانی كۆببێتەوە و سەرۆكی ئەنجومەنەكەش دەڵێت، كۆمەڵێك پۆست لە ناو سەركردایەتی یەكلادەكرێنەوە.

فەرید ئەسەسەرد، سەرۆكی ئەنجوومەنی سەركردایەتی یەكێتیی نیشتمانیی كوردستان بە مەودا میدیای راگەیاند "دوای ئاساییبوونەوەی دۆخی هەرێمی كوردستان و نەمانی نەخۆشی كۆرۆنا، كۆبوونەوەكانی ئەنجوومەنی سەركردایەتی بەردەوامیان دەبێت و كۆمەڵێك پۆست ماون یەكلابكرێنەوە".

ئەوەشی خستەڕوو "بڕیارە رۆژی شەممەی هەفتەی داهاتوو كۆببینەوە و ئەندام بۆردەكان دیاری دەكەین و 33 ئەندامی ئەنجوومەنی سەركردایەتی هەڵدەبژێردرێن بۆ لێپرسراویەتی بۆردەكان".

هەروەها وتی "بۆردەكان زۆربەی زۆریان سەر بە مەكتەبەكانە و بەشێكن لە مەكتەبەكان و هەندێكیشیان سەر بە سەرۆكایەتین، بەڵام ئەوانەیان پەیوەندیان بە مەكتەبەكانەوە هەیە گرنگە دیارییان بكەین و دەستبكەن بە كاری خۆیان".

لە دوای تەواوبوونی كۆنگرەی چوارەمی یەكێتی كە لە 21ی كانونی یەكەمی 2019 لە شاری سلێمانی بەسترا، ئەنجوومەنی سەركردایەتی چەندین كۆبوونەوەی یەكلەدوایەكی كردووە و چەندین پۆستی ناوخۆیی یەكلاكردوەتەوە.