مەودا میدیا-

بۆ جارێكی تر نرخی بەنزین لە شاری سلێمانی دابەزی، دوای ئەوەی نرخی نەوت لە بۆرسەی جیهانی دابەزینی گەورەی تۆماركرد، ئەوەش دووەمجارە لەو ماوەیە نرخی بەنزین دادەبەزێت، وتەبێژی بەنزینخانەكانی سلێمانیش دەڵێت، هەوڵدەدەین نرخی بەنزین دابەزێت ئەگەر رووداوە جیهانییەكان بەخێرایی نەگۆڕدرێن.

بەپێی بەدواداچوونەكانی مەودا میدیا، هەندێك لە بەنزینخانەكانی دەرەوەی شاری سلێمانی بەنزینیان كردووە بە 500 بۆ 525 دینار لە جۆری نۆرماڵ بۆ یەك لیتر.

بەهمەن قادر، وتەبێژی بەنزینخانەكانی شاری سلێمانی بە مەودا میدیای راگەیاند "دوێنێ ئێوارە، جارێكی تر نرخی بەنزین لە سەرجەم بەنزینخانەكانی ناو شارى سلێمانی دابەزی، ئەوەش دوومجاربوو لە ماوەی تەنیا یەك هەفتەدا نرخی بەنزین دابەزێنین".

ئەوەشی خستەڕوو "بۆ لیترێك بەنزین لە هەر سێ جۆرەكە بڕی 25 دینار تر كەمكراوەتەوە و ئێستا بەنزینی نۆرماڵ بە 550 دینارە، موحەسەن 625 دینار و سوپەر بە 700 دینارە".

وتیشی "دابەزینی نرخی بەنزین بەهۆی دابەزینی نرخی نەوتە لە جیهان، تائێستا بە ئاستێكی باش هاتووین، نازانین سبەی چی روودەدات، دابەزینی زیاتری بەنزین پەیوەستە بە رووداوە جیهانییەكان".

بەهۆی دابەزینی نرخی نەوت لە بۆرسەی جیهانی كە دوێنێ یەك بەرمیل نەوتی برێنت بە 16 دۆلار مامەڵەی پێوەكراوە، نرخی بەنزینیش كە دەرهاویشتەكانی نەوتەوە نرخەكەی دادەبەزێت.