مەودا میدیا-

فەرماندەی گشتیی هێزەکانی سوریای دیموکرات له‌باره‌ی به‌شداریكردنی له‌ دیداری مێپس ئاشکرایکرد داوایان لێکرا بەشداریی ئەو كۆڕبه‌نده‌ بكه‌ن، ئەو سەردانە بۆ ئەوان بایەخی هەیە و سەرەتای پرۆسەیەکی نوێیە بۆ باکوور و رۆژهەڵاتی سوریا.

مەزڵوم عەبدی، فەرماندەی گشتیی هێزەکانی سوریای دیموکرات (هەسەدە) رایگەیاند "سەرەتایەکی نوێ لە پەیوەندییەکانیان لەگەڵ باشووری كوردستان دەستپێدەکەن و گەشە دەکەن، بۆ ئەوەش پەیوەندییەکانیان لەگەڵ براکانیان لە باشوور تەواو سرووشتییە". 

ئاماژەی بۆ ئەوەشکرد "پشتیوانی باشوروی کوردستان بۆ باکوور و رۆژهەڵاتی سوریا پرسێکی گرنگە، بەشێوەیەکی گشتیی ئەوان سەرنجیان لەسەر پرسەکانی ئاشتی و دیالۆگ بووە لە رۆژهەڵاتی ناوەڕاست و بابەتەکانی تایبەت بە باکوور و رۆژهەڵاتی سوریا و پرسی کورد".

ئەوەشی خستەڕوو " تۆماس باراک، نوێنەری سەرۆکی ئەمەریکا ناوەڕۆکی کۆبوونەوەکەی ئەحمەد شەرع و دۆناڵد ترەمپی پێ راگەیاندوون و کۆبوونەوەکەش ئەرێنی بووە و پرسی باکوور و رۆژهەڵاتی سوریا لە نێویاندا هه‌سه‌ده‌ لەگەڵ ترەمپ تاوتوێ کراوە".

باسی لەوەشکرد " هاکان فیدان، وەزیری دەرەوەی تورکیا ئامادەی گفتوگۆکان بووەو تره‌مپ جەختی لە چارسەری کێشەکان لە رێگەی دیالۆگ و بەبێ شەڕ کردووەتەوە و ئەوانیش رازی بوون، هەروەها باس لە قوربانیدانی هێزەکانی سوریای دیموكرات (هه‌سه‌ده‌) لە دژی داعش کراوە".

ب ح