مەودا میدیا- سازگار ئەحمەد

ماوەی دوو رۆژە شاندی باڵای حکومەتی هەرێمی کوردستان بەسەرپەرشتی قوباد تاڵەبانی لە بەغدایە و کۆبوونەوەی نێوان شاندەکە و بەرپرسانی حکومەتی عیراق بە‌ردە‌وامن بۆ دۆزینە‌وە‌ی چارە‌سە‌ری گونجاوی هەردوو پرسی نە‌وت و دابینکردنی ماف و شایستەداراییەکانی ھەرێم لە بەرامبەر پابەندیەکانی ھەرێم بە ئیلتزاماتەکانی.

سە‌میر ھە‌ورامی، وتە‌بێژی قوباد تاڵە‌بانی، جێگری سە‌رۆكی حکومەتی هەرێمی کوردستان لە‌بارە‌ی ناوە‌ڕۆكی كۆبوونە‌وە‌كان رایگە‌یاند "کۆبوونەوەکانی نێوان شاندی باڵای حکومەتی هەرێم و عیراق بەردەوامن و لە گفتوگۆكاندا سەرەڕای خستنەڕووی زانیاری و دۆکیۆمێنتەکان وئاڵوگۆڕکردنیان چە‌ند پێشنیازێکی گونجاو گە‌ڵاڵە‌ كراون، وە‌ك چارە‌سە‌ر بۆ پرسەكانی نە‌وت و ماف و شایستەداراییەکانی ھەرێم".

ئاماژەی بەوەشکرد "چەند بەرپرسێکی باڵای وەزارەتەکانی دارایی و پلاندانان و نەوت وبەڕێوەبەری گشتی کۆمپانیای سۆمۆ و چەند راوێژکارێکی سەرۆک وەزیرانی عیراقی لە کۆبوونەوەکەندا بەشدارن".

وتە‌بێژی قوباد تاڵە‌بانی لەبارەی ئەوەی سبەینێش کۆبوونەوەکان بەردەوامی دەبێت وتی "بەڵی سبەینێش 8ی ئایاری 2020 کۆبونەوەکان بەردەوام دە‌بن‌".