مەودا میدیا-

‌ئه‌میری كۆمه‌ڵی ئیسلامی لەبارەی کۆبوونەوەی ئەمڕۆی پەرلەمانی کوردستان بۆ هەڵگرتنی پارێزبەندی لەسەر ژمارەیەک پەرلەمانتار راگەیاندراوێکی بڵاوکردەوە و رایگەیاند ەستخۆشیی ئاڕاستەی سەرۆكی پەرلەمان ‌و سەرجەم فراكسیۆنە هاودەنگەكانیش دەكەم، كە كە ئامادەنەبوون مل بدەن بۆ ئەو هەوڵەی پارتی دیموكراتی كوردستان كە پێموایە زیانێكی گەورەی بەسومعەی پەرلەمان‌و قەوارە سیاسییەكەمان‌و خودی خۆیشی گەیاند.

عەلی باپیر، ئەمیری کۆمەڵی ئیسلامی راگەیاند "بەپێویستم زانی لەبارەی كۆبوونەوەكەی ئەمڕۆی پەرلەمانەوە چەند سەرنجێك بخەمەڕوو، لەلای هەمووان ئاشكرایە هەرێمی كوردستان‌و عێڕاقیش بەبارودۆخێكی زۆر هەستیارو دژواردا ڕەت دەبن، كە پێویستیمان بە هەرچی زیاتر پاراستنی تەبایی‌و یەكڕیزیی هەیەو، گرێدانی كۆبوونەوەی پەرلەمان لەم هەل‌و مەرجەدا كە خەڵك‌و جەماوەر چاوەڕێ‌ی چارەسەركرانی گرفت‌و كێشەكانی گوزەرانیان دەكەن، بەمەبەستی لابردنی پارێزبەندیی (حصانە) لەسەر چەند پەرلەمانتارێك شتێكی سەیرو نالۆژیكییە!".

ئاماژەی بەوەشکرد "بێگومان هیچ كەس نكووڵیی لەجێ‌بەجێ‌كردنی یاسا ناكات‌و ئێمەش گرفتاری پێشێلكرانی یاساین، بەڵام یاسا نابێ‌ بە بانێكەو دوو هەوا پیادەبكرێ‌‌و وەك لاستیك بەكەیفی خۆت بەرەولای بەرژەوەندییەكانتی بكێشێ‌‌و، ئەگەر زانیت قازانجتە پەنای بۆ بەری‌و، ئەگەر زانیشت بۆت باش نیە پێشێلی بكەی، هەروەها ئێمە هەرگیز لەگەڵ لابردنی پارێزبەندیی پەرلەمانتاران نەبووین‌و نابین، مادام بەهۆی ڕەخنەگرتن‌و قسكەكردنەوە بێ‌، چونكە ئەوە مانای بێدەنگ كردنی پەرلەمانتارانەو پەكخستنی گرنگترین كاروچالاكییانە كە ڕەخنە گرتن‌و چاودێریی كردنی حكوومەت‌و دام‌و دەزگاكانە".

لە راگەیاندراوەکەشدا هاتووە "لێرەوەش زۆر سوپاس‌و دەستخۆشیی ئاڕاستەی سەرۆكی پەرلەمان‌و سەرجەم فراكسیۆنە هاودەنگەكانیش دەكەم، كە كە ئامادەنەبوون مل بدەن بۆ ئەو هەوڵەی پارتی دیموكراتی كوردستان كە پێموایە زیانێكی گەورەی بەسومعەی پەرلەمان‌و قەوارە سیاسییەكەمان‌و خودی خۆیشی گەیاندوو، درزێكی سیاسیی گەورەی پەیداكرد".

ئەوەشخراوەتەڕوو "جێی سەرسوڕمانیشە كە پارتی دوێنێ‌ گوێ‌ی بەداواكاریی حەوت فراكسیۆنی جۆراوجۆری پەرلەمان نەدا، بۆ چاوپێداگێڕانەوەی ئەو هەوڵ‌و هەنگاوەی، ئایا ئەو لایەنەی لەهەموو كەس‌و لایەنێك "بەحەق یان ناحەق" لەم وڵاتەدا زیاتر بەهرەمەندە نەدەبوو بەتەنگ پاراستنی تەبایی‌و یەكڕیزییەوەبێ‌؟".

لە کۆتایشدا عەلی باپیر دەڵێت "هیواداریشم هیچ كەس گرەو لەسەر ئەوە نەكات كە كۆمەڵی ئیسلامیی لەژێر زەخت‌و فشاردا دەستبەرداری هەڵوێستە مەبدەئییەكانی بێت، بەتایبەت وەدەنگ هاتن لەسەر بەرژەوەندیی گشتیی‌و بەرگریی لەچینی هەژارو نەدار، هەروەها كاك سۆران عومەریش كادیرێكی دڵسۆزو كارای كۆمەڵی ئیسلامییەو، هیچ كات لاریی نەبووە لە ئامادەبوون لەبەردەم دادگادا گرنگ ئەوەیە دادگاییەكی دادگەرانەو بێ‌ غەرەز بكرێت".