مەودا میدیا-

به‌ڕێوه‌به‌ری هاتووچۆ پارێزگای سلێمانی ئاماژه‌ به‌وه‌ده‌كات، له‌رۆژانی داهاتودا كامێره‌ گه‌ڕۆكه‌كان ده‌خرێنه‌وه‌ كار‌و له‌باره‌ی كامێره‌ جێگیره‌كانیش ده‌ڵێت" له‌پێناو رێگریكردن له‌رووداوی هاتووچۆ، ئه‌وانیش ده‌خه‌ینه‌وه‌ كار، چونكه‌ تیژڕه‌وی زۆر گیانی شۆفێرانی خستۆته‌ مه‌ترسییه‌وه‌".

عه‌مید فه‌ره‌یدون عومه‌ر، به‌ڕێوه‌به‌ری هاتوچۆی پارێزگای سلێمانی به‌ترافیك ئێف ئێمی راگه‌یاند " پێش هاتنی كۆرۆنا به‌نیازبوون كامێره‌ جێگیره‌كان بخه‌نه‌وه‌ كار، به‌ڵام به‌هۆی راگرتنی ده‌وامه‌وه‌ ئه‌و كاره‌یان خستوەته‌ دوای جه‌ژن".

وتیشی " سه‌رجه‌م كامێره‌ جێگیره‌كان كه‌ ژماره‌یان (21) دانه‌یه‌، راسته‌وخۆ كاره‌بایان به‌ستراوه‌ته‌وه‌ به‌كاره‌بای نیشتیمانی‌و هیچ گرفتێكیان نییه‌، راسته‌ سستمه‌كه‌ كۆنه‌و ده‌بێت رۆژانه‌ كارمه‌ندانی هاتووچۆ داتای كامێره‌كان به‌ئامێرێكی گوازه‌ره‌وه‌ی ئه‌لیكترۆنی بگه‌ڕێننه‌وه‌ بۆ هاتووچۆ، به‌ڵام چاره‌سه‌ری ئه‌و گرفته‌ش هه‌یه‌، ده‌توانرێت له‌رێگه‌ی فایبه‌ر ئۆپتیكه‌وه‌ سه‌رجه‌م داتاو زانیارییه‌كان راسته‌وخۆ په‌یوه‌ستبكرێت به‌به‌ڕێوه‌به‌رایه‌تی هاتووچۆوه‌‌و له‌داهاتو كار بۆ ئه‌وه‌ ده‌كه‌ین".

هەروەها وتی" له‌رۆژانی داهاتودا كامێره‌ گه‌ڕۆكه‌كانیش ده‌خرێنه‌وه‌ كاركردن".