مەودا میدیا-

ئەمڕۆ شەممە، نرخی نەوت لە بازاڕی بۆرسە گەورەترین بەرزبوونەوەی تۆماركرد و بەربەستی 41 دۆلار تێپەڕاند.

پێش سێ مانگ كە نرخی نەوت دەست بە دابەزین كرد، بەشێوەی خێرا نرخەكەی خۆی لە دەستدا و بۆ یەك بەرمیل بۆ خوار 15 دۆلار دابەزی لە جۆر برێنت و نەوتی خاویش گەیشتە سفر دۆلار.

ئەمڕۆ شەممە، دوای دوو مانگ لە دابەزینی، جارێكی تر نرخی یەك بەرمیل نەوتی برێنت بۆ 42 دۆلار بەرزبووە و ئەوەش گەورەترین بەرزبوونەوەیە لە دوای دابەزینی، هەروەها نرخی یەك بەرمیل نەوتی خاوی ئەمریكیش بۆ 39 دۆلار بەرزبووەوە.

نەوزاد شێخ كامیل، شارەزای بواری ئابووری بە مەودا میدیای راگەیاند "لەگەڵ بەرزبوونەوەی نرخی نەوت لە بازاڕەكان، كاریگەری راستەوخۆی دەبێت لەسەر داهات، بە تایبەتی بۆ هەرێمی كوردستان كە پشت بە نرخی نەوت دەبەستێت بۆ دابەشكردنی مووچە".

ئەوەشی خستەڕوو "بەو شێوەیەی ئێستا نرخی نەوت بەردەوام بێت لە بەرزبوونەوە بە دڵنیایەوە كێشەی دواكەوتنی مووچە نامێنێت".