مەودا میدیا

دوای دوو هەفتە بەردەوامبوون لە تووشبوون بە كۆرۆنا لە سلێمانی و زۆری ژمارەی تووشبووەكان، جێگری بەڕێوەبەری گشتی تەندروستی پارێزگای سلێمانی رایدەگەیەنێت، ئەگەر خۆپارێزی هاوڵاتیان بەو شێوەیەی ئێستا بەردەوام بێت لە هەفتەی داهاتووەوە تووشبوون بە كۆرۆنا لە شارەكە زۆر كەم دەبێتەوە.

هێرش سەلیم، جێگری بەڕێوەبەری گشتی تەندروستی پارێزگای سلێمانی رایگەیاند "لە ماوەی دوو بۆ سێ رۆژی رابردوو هاوڵاتیان بەشێوەی باش خۆپارێزییان كردووە و ئەگەر بەو شێوەیە بەردەوام بێت و هاوڵاتییان بەشێوەی باش خۆیان بپارێزن، لە هەفتەی داهاتووەوە حاڵەكانی زۆر كەم دەبنەوە".

ئاماژەی بەوەشكردووە "ئەم هەواڵە دڵخۆشكەرە، ژمارەی تووشبووان بەردەوام لە كەمیدایە و دڵنیایی دەدەین ئەگەر هاوڵاتیان تاكپارێزی بكەن دۆخەكە باشتر دەبێت".