مەودا میدیا- سازگار ئەحمەد

بەڕێوەبەری گشتیی هاتوچۆی سلێمانی رایدەگەیەنێت بەم نزیکانە کامێرا جێگیرکراوەکانی هاتوچۆ لە شەقامەکان دەخرێنەوە کار، ئاماژەی بەوەشکرد تاوەکو دوای جەژن هیچ مامەڵەیەک خەرامەی ناکەوێتەسەر.

فەرەیدون عومەر، بەڕێوەبەری گشتیی هاتوچۆی سلێمانی بە مەودا میدیای راگەیاند "دەمێکە بڕیارە کامێرە جێگیرکراوەکانی سەر شەقامەکان بخرێنەوە کار، بەڵام بەهۆی نەبوونی دەوامەوە جێبەجێکردنی بڕیارەکە دواکەوت".

لەبارەی کاتی کارپێکردنەوەی کامێرا جێگیرەکانەوە بەڕێوەبەری گشتیی هاتوچۆی سلێمانی وتی "بەم نزیکانە ئەو کامێرانە دەکەونەوە کار".

ئەوەشی خستەڕوو "تاوەکو دوای جەژن هیچ مامەڵەیەک خەرامەی ناکەوێتەسەر، هەروەها مامەڵەکردنی دەرکردنی مۆڵەتی شۆفێری بەردەوامە".