مەودا میدیا-

وەزارەتی تەندروستی حكومەتی عیراق رایدەگەیەنێت، لە ماوەی 24 كاتژمێری رابردوو لە شارەكانی عیراق و هەرێمی كوردستان زیاتر لە دوو هەزار و 300 تووشبووی كۆرۆنا چاكبوونەتەوە.

لە راگەیەندراوێكی ئەو وەزارەتە هاتووە "لەو ماوەیەدا پشكنین بۆ 16 هەزار و 498 هاوڵاتی كراوە و دەركەوتووە دوو هەزار و 163 هاوڵاتی تووشی نەخۆشی كۆرۆنا بوون لە عیراق و هەرێمی كوردستان".

بەپێی ئامارەكەی وەزارەتی تەندروستی عیراق لە ماوەی ئەو 24 كاتژمێرەدا ژمارەی چاكبووەوەكانی كۆرۆنا لە ژمارەی تووشبووان زیاتر بووە.

لە سەرەتای بڵاوبوونەوەی كۆرۆنا تائێستا لە عیراق و هەرێمی كوردستان 94 هەزار و 693 هاوڵاتی تووشی نەخۆشیەكە بوون، 62 هەزار و 836 هاوڵاتی چاكبوونەتەوە و كۆی مردووانیش بۆ سێ هەزار و 869 كەس بەرزبووەتەوە.

ه،ع