مەودا میدیا- سەركۆ جەمال

سكرتێری گشتی نەتەوە یەكگرتوەكان پشتیوانی خۆی بۆ رێككەوتنی ئیسرائیل و ئیمارات راگەیاند، ئاماژە بەوەشدەكات ئەو رێككەوتنە هەنگاوێكە بەئاراستەی چارەسەركردنی كێشەكانی نێوان ئەو دوو وڵاتە. 

ئەنتۆنیۆ گۆتێرێز، سكرتێری گشتی نەتەوە یەكگرتوەكان، رایگەیاند "پێشوازی لە راگەیەنراوی هاوبەشی هەرسێ لایەنی ئەمەریكا، ئیسرائیل و ئیمارات دەكات و هیواخوازە ئەو رێككەوتنە بەئاراستەی كۆتایهێنان بێت بەكێشەی نێوان ئیسرائیل و فەلەستین".

گۆتێرێز، "هیواشی خواست سەركردەكانی ئیسرائیل و فەڵەستین لەچوارچێوەی بڕیارەكانی نەتەوە یەكگرتوەكاندا كۆتایی بە كێشەكانی نێوانیان بهێنن، وتیشی پێشتر ئەوان داواییانكردووە، ئیسرائیل پرۆژەی داگیركاری و دروستكردنی یەكەی نیشتەجێبوون لەبەرەی رۆژئاوا رابگرێت".

ئیسرائیل و ئیماراتی عەرەبی بۆ یەكەمجار رێككەوتنێكی ئاشتیانەیان واژۆ كردو وەك بەشێكیش لەو رێككەوتنە، ئیسرائیل رایگەیاند بەشێوەیەكی كاتی پرۆژەكانی دروستكردنی یەكەی نیشتەجێبوون لە بەرەی رۆژئاوا رادەگرێت.